Otro luna ta tuma luga Festival Un Canto pa Aruba, y Festival Himno & Su Bandera Infantil- Hubenil y Adulto. Recientemente e cantantenan a bini hunto pa e ceremonia di inscripcion.
E organisacion ta den man di Comision Promove Cultura y Fundacion Cultural di Festivalnan Folklorico. Aki por a nota presencia di Harry Croes, un persona bon conoci den mundo di cultura, na cabes di diferente festivalnan folklorico na Aruba.
Ya caba tin mas cu 20 festival organisa dedica na himno y bandera y di cual e ultimo aki tin mas cu 20 persona inscribi caba. Den e festival aki ta keda expresa e sentimento y loke ta biba den curason di e Arubianonan. Den tur e festivalnan organisa, por bisa cu mester a yega casi 1000 composicion caba dedica na e amor patriotico pa Aruba.
Ta den prepracionnan pa e tres dianan di e festival di otro luna, unda cu riba e anochi final lo tin 20 cantante / composicion participando. Tin un premio total di 10 mil florin pa e tresnan cu keda na final. O sea e ganado lo haya 5 mil florin, 1er finalista 3000 y 2do finalista ta haya 2000 florin.
Cantante, compositor y areglistanan ta hopi entusiasma y nan ta sinti cu un biaha mas lo tin un competencia hopi fuerte cu tur e material cu tin prepara pa e festival dedica na Himno y Bandera di Aruba.
Dia 28 di februari ta fecha limite pa e participantenan entrega nan areglo. Por bisa cu e festival infantil tuma luga riba dianan 6 y 7 di maart. Riba diabierna tin e categorianan di 4 pa 6 aña y esnan di 13 pa 17 aña, mientras cu riba diasabra tin e categorianan di 7 pa 9 aña y esnan di 10 pa 12 aña. E final lo ta riba diadomingo. E Festival aki tin 46 hoben registra pa participa den e diferente categorianan, cu 18 diferente banda compañando nan.
Pa e festival pa adulto tin 17 grupo registra cu 41 cantante. E pre finalnan ta riba 11 y 12 di maart mientras cu e final ta riba 14 di maart.
