Pensa Bo mes dos biaha prome cu sali di fiesta y laga rastro atras riba rednan social, pasobra e por ta determinante ora companianan mester tuma decision despues pa tuma Bo na trabou. Bale la pena evalua bon prome cu publica pensamentonan radical di manera agresivo a traves di plataformanan of skirbi cu cantidad di erornan ortografico.
For di un base di 2058 diferente compania, un total di 19% a sigura cu nan a yega di rechasa candidatonan cu a aplica pa trabou, debi na nan interaccion riba internet. Asina e encuesta YouGov riba e tema aki, a saca como conclusion. Mester bisa cu e contesta tabatin un proporcion mas grandi, pasobra 28% di negoshinan grandi a contesta positivo, 22% di negoshinan mediano y 11% di negoshinan chikito.
E trend aki ta mas popular ora di recluta empleadonan pa funcionnan cu mas responsabilidad, pues di personanan cu mester bira “cara” di e empresa.
For di e encuesta a sali afo cu si e candidato tin un compartacion inapropia of tin noticianan negativo riba rednan social, ta menciona of ta duna comentario politico extremista, cu e compania lo mester evalua si e candidato lo ta valioso pa ta un referente di e compania.
Kico ta considera inapropia
Riba e pregunta di ki tipo di publicacionnan por comberti den un obstaculo pa haya trabou, e encuesta a saca afo cu 75% ta opina cu e uzo di un lenguahe ofensivo lf agresivo, sigui pa 71% cu ta bisa cu si e candidato ta duna referencia pa uzo di droga, 56% ta opina riba skirbimento cu erornan ortografico, 47% ta contra publicacion di potretnan inapropia, 29% contra publicacionnan politico mientras cu 26% ta mira cuanto publicacion e candidato tin riba red social.
Cua red social ta uza pa recluta trahado
Segun e encuesta, companianan (48%) ta uza e plataforma LinkedIN mas pa recluta empleado. LinkedIN ta funda desde 2003 pero Microsoft a cumpre na 2016 y a haci’e e red profesional principal di mundo. Na di dos luga ta sigui Facebook (46%), Twitter (28%), Instagram (15%) y lo demas ta menos uza.
Tene cuenta cu….
No mester spanta, importante ta cu Bo publicacionnan ta spontaan y coherente den bo bida di tur dia. E recomendacion ta valido, pero di otro banda, e aspectonan mas importante ainda ora di tuma un empleado na trabou ta:
• Habilidad y conocemento (75%)
• Comportacion den entrevista di trabou (68%)
• Conocemento di e negoshi (52%)
• Apariencia y sigur di su mes (51%)
• Lealtad na companianan unda a traha (39%)
• Buraco den historia laboral (21%)
Pues, prepara Bo mes bon, ahusta bo perfil riba rednan social y busca trabou!