Den e ultimo dianan aki polisnan ta man yen cu diferente caso di maltrato cu ta tumando luga rond Aruba. Dialuna polisnan ta haya un biaha mas yamada di maltrato. Pa 3:45PM Polis di San Nicolas a bay atende cu e caso di maltrato. Na yegada nan a papia cu habitante di e cas y a haya sa kico tur a pasa entre e personanan.
E señora a splica polisnan cu nan tabata den e cas y diripiente e homber a cuminsa maltrat’e fisicamente. Esey a pone cu e dama a pidi asistencia policial pa atende cu su agresor. Despues di a scucha kico a pasa, polisnan a opta pa yama transportwagen.
Na yegada di e transportwagen polisnan a sigui e protocol di bisti e detenido cu mondkapje pa sigui evita plamamento di contagio di Coronavirus y pa bay cu e agresor warda di polis na San Nicolas p’e presenta dilanti sub fiscal. Aki e mester a declara kico tur a pasa y pa e sub fiscal dicidi si e agresor ta keda cera of no.
