Diasabra anochi a yega Hospital un otro mama cu su yiu, abusa sexualmente na Mabon. Parce cu e mucha homber di apenas 3 aña di edad a bira victima di abuso di su mesun omo. Su mama corectamente a hib’e Hospital pa samin’e y haci e pruebanan necesario cu a comproba penetracion y pruebanan a sali positivo. Husticia no por a confirma ainda si entretanto e omo ta deteni caba.
Mester bisa cu den e caso aki si e mayor ta determina pa cana e caminda penal contra e abusado di su yiu di apenas 3 aña di edad. El a bisa di lo a bay Polis pa keha e omo y pa sigura su mes cu e ta protega su yiu di e tipo di hendenan asina cu un mente troci.
Bidanan marca pa semper
No mas cu den fin di siman nos a entrevista un victima di abuso sexual cu a sigura cu e trauma cu ta sigui despues di un abuso sexual ta hopi largo. Un señora abusa 42 aña pasa ainda ta biba tur dia cu e trauma y ta limita di haci hopi cos cu pa otronan ta masha normal, debi na e mesun trauma aki. Ta bon pa abusadonan tene esaki na cuenta, cu nan actonan awe lo marca bida di nan victima pa semper. Ta pesey, un aplauso pa mayoran cu ta bisa “Ta Basta” y ta hiba nan yiu Dokter pa samina y pa yega cu prueba den man na Polis pa investiga y persigui e sospechoso envolvi. Ta dor di papia, ta dor di entega keho y sali padilanti, hunto nos ta frena e tendencia negativo aki den nos comunidad.
