Mary Wever-Lacle: E dama di hero den politica di Aruba

1488

Mary Silvany Filomena Lacle a nace na Aruba riba 13 di augustus 1947 di mayornan Leonardo (Netty) Lacle y Maria (Shon Marie) Croes. Netty Lacle tawata diputado pa AVP hopi aña pasa. Di chikito Mary su tata a introducie na politica, lagando e compañe haci bishita na pueblo, siñ’e etica con ta ricibi y trata bishita di dignatario na cas, inculca e compasion y sentido di comparti cu esunnan cu tin menos y dun’e un aprecio pa sirbi comunidad. 

Infancia y Educacion y Comercio

Cu su 12 aña Mary a wordo manda un internaat na Monster, Hulanda – un scol caminda multiple otro yuinan di politico tambe tawata bay scol. Pero lastimamente, su tata a haya un stroke ongeveer un aña despues na 1960 y a bira lam. Esaki a pone e situacion financiero di e famia di 8 yui bira preta y Mary a hay’e obliga di regresa Aruba. Na Aruba el a bay Maria College/MULO. Rumannan ta corda con despues di su regreso Mary tawata bay den freezer pa saca ijs y hunt’e riba su wangnan pa replica e sentido frieu di Hulanda y pa stimula su wangnan keda cora.

Di su tata Mary no tawata mag di sali mucho y menos pa un fiesta. Amistadnan mester a bin cas. Maria College e tempo ey tawata un scol pa mucha muhe so, y La Salle College, un scol pa mucha homber. Eynan su wowonan a cay riba un galan cu yama Alvin Wever, un studiante na La Salle College, cu tawata pasa trip dilanti Maria College. Naturalmente Mary no por a haci nada ya cu su tata tawata hopi streng pa e banda ey. Porfin na final di su penultimo aña escolar, Maria College y La Salle College a organisa un fiesta conhunto pa cera e aña escolar. Aunke cu hopi gana pa bay e fiesta, su tata no a permitie. Door cu Mary tawata un bon studiante, ta un di e zusternan a baily te su cas, pidi e tata pa Mary por ta presente na e fiesta como e best geslaagde di su klas di frances pa entrega un premio na un di su juffrouwnan. Su tata a bay di acuerdo, pero bou di e condicion cu e tambe ta bay, como chaperonne. 

Na e fiesta, cu intermediacion di un amigo di Alvin, Jossy (Papichi) Brokke y amiga di Mary, Hilde Hart cu a manda mensahe pa otro cu si Alvin pidi Mary pa baila, e lo acepta, asina e cabayero timido a bay lanta Mary pa baila. Mary mes tawata conta cu nan a baila “cara chito, chito” cu otro henter anochi. Asina mes bou di e wowonan skerpi di e tata. E pareha a fit bon desde e dia ey, tur dos cu ambicionnan grandi pa nan futuro hunto. Y ta conoci como un pareha amoroso, dedica y keto bai manera dos “teenagers in love”.

Mary a caba MULO na 1967. Den un temporada cu ta conneccion politico tawata determina si bo por sigui studia of no, despues di a termina Maria College, Mary no a haya beurs pa bay Hulanda. Su ruman homber mayo tawata na Hulanda caba y como e ruman mas grandi na Aruba, e mester a bay traha pa yuda sostene e famia. Su tata a bay papia cu Padu del Caribe cu e tempo ey tawata station manager di ALM y a logra haya un puesto pa Mary na ALM como ground passenger handler. Pa henter su bida, Mary a keda cu un aprecio enorme pa Padu pa e.o. su ayudo. Mary a traha duro, frecuentemente a tuma extra shift di su coleganan masculino cu tawata kier anochinan liber pa bay sali cu nan galeins. Ademas, e tawata hasi hopi trabou pafo di su trabou na ALM, bende productonan manera (lingerie, paña di cama, serbete, etc.) cu e ta cumpra for di doño di Moises de Marchena di Corsou, Armando de Marchena. 

Un aña despues na 1968, e tata a sufri un di dos stroke cu consecuencia cu e no a sobrebibi esaki. Cu tur su rumannan chikito na scol ainda, e peso di famia a cai riba dje. Cu mas dedicacion y ambicion e la asumi mas responsabilidad y a cuminsa cater fiesta, traha snacks, bolo pa sirbi na bruid y otro fiestanan. 

Dia 31 di juli 1970 Mary y Alvin a drenta enlace matrimonial (wak portret). Un paar di luna despues Mary tawata na estado di su prome yui, y cu pa regla di ALM a causa perdida di su trabou. E realidad bibo di keda sin trabou a jump start e negoshi Masy-Fral. Dia cu e la duna luz na su prome yui ainda Mary tawata riba caya ta entrega mercancia na su clientenan. Masy-Fral a cuminsa como un negoshi di bende acesorio di casamento y poco poco a bira un tienda di paña di ballet pa awendia ta un negoshi di hobbies & crafts.  

Como mama, Mary tawata hopi dedica na su yuinan. Semper envolvi na y cu scol, den organisacion di mayor y pusha pa mehoracion y cambia ineficiencianan. Y haciendo esey a bringa fuerte pa enseñansa pa tur. 

Politica

Durante e mesun tempo ey, Edgar (Watty) Vos a aserca Mary den un capacidad politico pa yud’e organisa e districto di playa. Mary a acepta y ora e commit cu algo ta 100% of nada. Pero den e mundo politico, un mundo di homber, bida no tawata facil. 

Na 1979, Mary a aparece pa prome biaha riba un lista politico y esey tawata riba number 4 pa Partido RUBA di lider sr. Watty Vos (wak PDF: Lista RUBA). Como partido nobo, Partido RUBA no a saca niun asiento e eleccion ey y despues cu Partido RUBA a join cu Partido AVP, ya Mary a dicidi di dedica mas tempo na su famia jong y na su negoshi. Durante e periodo di comerciante, Mary hunto cu su casa a habri dos otro negoshi, esta Wedico N.V., un agencia di wholesale y despues Marking Productions N.V.

Durante e siguiente 10 añanan Mary a continua crece su negoshi. Cu su yuinan tieners, su gana pa politica y pa sirbi comunidad a bolbe lanta. Y na 1989 a bolbe subi un lista politico pero e biaha aki hunto cu su ex-colega y amigo di Partido RUBA, Watty Vos, riba nr. 22 di partido AVP lidera pa Henny Eman. Cu cada eleccion, Mary a gosa cu mas voto di Pueblo. Asina pa eleccion di 1993 y 1994, e tawata riba number 14. Ta cu e victoria di Partido AVP cu a forma gobierno cu Partido OLA, Mary a haya oportunidad pa bira Parlamentario (wak portret: Parlamentario AVP 1994) y a wordo nombra Vice Voorzitter di Parlamento. Durante su periodo como parlamentario el a bringa ferosmente pa causanan di muchanan y hobennan e.o. a haya su mes den casonan di corte pa ceramento di lugarnan nocturno. (wak portret: Mary na caminda pa corte). Y tambe a laga un concepto di ley atras pa curfew di menornan di edad.

Mary semper a tuma su trabou parlamentario na serio y a busca pa coopera cu tur su coleganan, hasta su contricantenan den oposicion. Su ideologia pa traha brug pa yega na otro y pa crea un esfera di colegialidad entre coleganan ta bibo den dje y ta corda palabranan di su tata: politica ta diferencia di opinion y no enemistad. Tur siman e ta trece un treat, sea un pan dushi of algo otro dushi di pasa boca pa su coleganan y staf. Fin di aña ta organisa Christmas dinners na Ristorante Sole Mare. Cu esaki durante kebrante di salud di su mama, caminda e mester a biaha pa Merca y no tabatin quorum den Parlamento pa tratamento di presupueso, ta miembronan di oposicion di fraccion di MEP a coopera cu ne, pa forma quorum.

Cu e dolor di e problema financiero cu su mama y henter su famia a keda aden despues cu su tata a fayece despues di a sirbi su Pueblo, Mary a traha duro tambe pa drecha e posicion huridico di un politico, un punto hopi controversial te dia di awe. 

Pa aña Parlamentario nobo na September 1997, a bin un disputa entre e miembronan di coalicion caminda OLA a exigi e vice-voorzitterschap di Parlamento. Den un entrevista cu prensa, Mary su lenga skerpi a yama e relacion cu OLA e famoso ‘postema’ cu lo por rementa. Mary a ricibi hopi critica pero mas sosten ainda di su expresion. No obstante esaki e coalicion cu ya tawata tambalia no a wanta y gobierno a cay faltando un aña den e gobernacion. A yama eleccion di biaha y aunke AVP a subi den voto, e reparticion di asiento a keda mescos, esta 10 pa AVP, 9 pa MEP y 2 pa OLA. Asina coalicon entre AVP y OLA a bolbe forma. 

Durante formacion, Mary a wordo yama pa lider di AVP, sr. Henny Eman, y a wordo pidi pa asumi e posicion di minister di Enseñansa y Labor. Un sorpresa grandi pa Mary pero tambe na mesun momento un sentido di gratidud pa e confiansa, Mary mester a duna contesta casi di biaha. Y banda di su casa y amigonan di confiansa, Mary a conta enormemente riba su conseheronan politico, sr. Pedro (Chipip) Bislik, Shon Lopez, y sr. Lope Beaujon, pa yud’e cu su decision cu a bira uno positivo.

Como minister di Enseñansa y Labor, Mary a continua bringa pa muchanan y nan futuro. E la haya e nomber “mama Mary” cariñosamente den Pueblo cu e la carga cu orguyo. Mary a zorg pa tur mucha, no obstante su status, por a ricibi enseñansa y asina a percura pa un reconocemento na 2018 di e Consul Honorario di Filipinas y e Consul General di Republica Dominicano pa esaki. Mary a organisa e plantacion di mata pa studiantenan den Parke Nacional Arikok como simbolo di planta pa bo futuro. E la introduci e feria universitario (e asina yama Aruba College Fair) y despues a bira co-fundador di Aruba College Fair Foundation pa garantisa cu e proyecto sigui unabes e no ta minister mas.

Mary a reorganisa e Departamento di Labor, creando asina un departamento di conocemento, un departamento di caliber halto cu puestonan ocupa pa profesionalnan. 

E Persona Mary

Mary tawata un persona corecto. E tabatin caracter fuerte y dominante, sigur cu a yud’e den e profesion asina domina pa homber – esta politica. E no tawata tin cabey riba lenga y asina ta conoci pa hopi expresionan skerpi y tambe como e Iron Woman, e Margaret Thatcher di Aruba, e dama de hiero. Semper e tabatin un presencia unico, cu hopi confiansa y a gana confiansa di hopi tambe. 

E ta conoci tambe pa gusta un bon champagne y biña y tawata organisa hopi wine tasting pa trece hende hunto pa un borrel y gezelligheid. E tawata disfruta semper di Carnaval aunke e mes no ta aden pero si a gosa di yuda otro prepara, no solamente den su negoshi te madruga pero tambe afo. 

Su amor pa biaha a hib’e hopi parti mundo y a percura pa su yuinan tambe tin e mesun experiencia. Un dama respeta y cu a exigi respet. Semper a exigi pa su invitacionnan como politico inclui su casa. 

Otro posicionnan

Mary ta co-fundado di Fundacion 18 di maart cu ta reconoce y celebra e 2147 firmantenan den un peticion na La Reina pa Aruba haya Status Aparte. El a sirbi como Presidente di e Fundacion di 1990 pa 2018. 

Mary a co-funda International School of Aruba (aunke den su curason) ya cu oficial no pasobra e no tawata na Aruba pa firma.

Mary a sirbi tambe riba un di e prome oudercommissies di Colegio Bon Bini. 

Salud

Henter su bida, Mary a gosa di un bon salud. Ta na aña 2015, el a sufri un stroke leve pero a recupera basta lihe fisicamente. A cuminsa experiencia si problemanan di memoria cu progresivamente a bira mas notabel. Cu e pandemia global di Covid-19, Mary a contrae e virus y mester a wordo interna den dr. Horacio E. Oduber Hospital. Su condicion no a mehora y Mary a sucumbi na e virus riba diasabra 14 di november 2020 ultimo.

Mary ta laga atras un casa, dos yui y dos nieta. Y un famia grandi di rumannan, swa y cuñanan y amigonan di decadanan largo. Su goso di bida, sociabilidad cu tur hende, a gan’e amor y aprecio di hopi y su perdida lo wordo sinti enormemente.