Despues di un siman di campaña, e premio di un fin di siman cu tur cos paga den Riu Palace Antillas a conta cu un record cantidad di 3,472 “shares” y 2,772 “Likes” riba e Facebook di 24ora.com. Diabierna a entrega e premio na e feliz ganado, Mary van der Biezen. El a ricibi su premio for di mannan di Juan Blanco, gerente general di Riu Palace Antillas y Theodoor de Jongh di Headlines Group, cas editorial di e website di noticia mas grandi di Aruba.

E ultimo siman di luna di Juni, 24ora.com hunto cu Riu Palace Antillas a los un campaña riba Facebook, den cual a rifa un estadia di un fin di siman, cu tur cos paga, pa un pareha. E cadena di hotelnan RIU ta entre e hotelnan mas ocupa na Aruba, pero asina mes, durante luna di vakantie, ta regala un pareha un estadia cu nunca mas nan lo por lubida.

Pa a participa tabata facil, djis mester a “like” e promocion y comparti’e “share” riba Bo Facebook y ya bo ta den wega. Miles di usuario a participa, haciendo e campaña aki esun mas exitoso te awor riba nos Facebook. E intencion ta pa regularmente sigui rifa premio entre nos mas di 58 mil siguidonan riba Facebook.

Mary van der Biezen tabata masha contento ora di acepta su premio. E no tin un fecha ainda den mente, pero lo ta pronto si. El a conta nos cu un amiga a encurashe pa participa y el a pensa, lag’e purba. El a graduci Riu Palace Antillas y 24ora.com pa a saca su nomber como e ganado.

Siendo e portal di noticia mas mira na Aruba, 24ora.com ta consciente cu su usuarionan ta busca mas cu djis noticia so. Awendia e industria di noticia ta cana man den man cu entretenimiento y ta un reto pa mantene cantidad di usuario pendiente henter dia riba website, riba Facebook, Twitter, Instagram of awendia tambe via nos app den nan celular. Ta pesey regularmente ta tene campaña promocional den cual ta rifa premionan na cantidad.

Comments

comments