Mary Joan Foundation lo bay tin su caminata anual, cual ta e caminata roos. E aña aki Mary Joan a pidi pa haci e caminata un tiki mas otro.
Segun vice presidente, Jose Tromp, e aña aki e caminata lo ta diasabra awo, pero anochi pa 7’or. E caminata lo start for di Plaza Nicky Habibe. Lo bay cana den un forma mas pasivo, asina tambe cu un luz y conmemora esnan cu nan luz ya no t’ey mas cu nos y esunnan cu t’ey, pa rebiba nan luz cu nan tin y asina por cana pa e bon causa cu ta combatimento di cancer di pecho.
Ta invita henter pueblo di Aruba pa jong Mary Joan, cera bo grupo chikito y asina tambe por cana henter e anochi aki y ora cu yega Plasa bek, lo bay tin animacion di un grupo musical y asina keda te cu 10’or di anochi riba plasa y disfruta di e anochi.
Motibo special
Semper Mary Joan tin e caminata. E ta mas pa enfoca pa por ta hunto den un parti recreativo. Manera cu sa, ta pa recauda fondo pa e fundacion.
E caminatanan di Mary Joan semper ta bay mas of menos 900 persona. Pero e aña aki e interes ta un tiki mas abao. Aña pasa e tabata toch basta bon, pero e biaha aki e interes ta un tiki poco.
Gruponan por consisti di 10, 20 of hasta 5. Asina ta cera bo grupo y cana hunto cu Mary Joan. A scoge pa un luga mas cozy, pa asina nan por ta mas cera uno cu otro.
E cantidad
Mary Joan Foundation ta ekipa pa mil participante, pero nunca lo haal e cantidad aki. Segun Tromp, si yega na 500 persona, nan lo keda hopi contento. E caminata aki ta di un costo di 20 florin. Carchinan ta obtenibel na Centro di Mary Joan Foundation den cura di Atco na Dakota, y tambe na Djispie’s Place. Hunto cu bo ticket bo ta haya bo lampi y bo tshirt.
Martijn Trading
Martijn Trading ya ta sponsor pa 3 aña di e caminata anual aki y pa nan ta un honor grandi un biaha mas pa sponsor cu nan productonan Libresse, Spa Water y tambe e yoghurtnan Elle & Vire. Kenneth Simon, Business Manager di e compania, a comenta cu cuater luna pasa a cuminsa cu un campaña di Elle & Vire. Elle & Vire ta “Do Well & Eat Well”, cu cada compra di un yoghurt, Martijn Trading ta contribui un biaha mas na Mary Joan Foundation. A recauda un cantidad di 3750 florin, cual a entrega esaki na Mary Joan Foundation. Ta spera cu pa 2020 e campaña sigui core y na final di aña, of pa e proximo candidata, e fondonan lo ta mas grandi di loke cu ya tin caba.
Simon kier a gradici comunidad cu a aporta na compra di e yoghurtnan, unda cu por duna be na Mary Joan Foundation. Na final di e caminata, lo bay tin nan tent cu refreshment di e productonan di Elle & Vire y Spa Water. Tambe nan lo tin un stand unda cu por haya informacion of cualkier goodies di Libresse.
Tambe Simon kier a gradici Mary Joan Foundation pa e confiansa den Martijn Trading, pa ta un di e sponsornan. Tambe Simon kier a duna tur participantenan cu lo participa y esnan cu tey pa inscribi ainda, hopi exito, pasobra e ta un bon causa. Esnan cu no ta inscribi, haci’e ainda. Manera e tema di Mary Joan, “nos tur tin nos luz cu ta briya riba caminda”. Pesey ta duna un man briya e caminda pa esnan cu den bida cu mester e luz mas fuerte pa briya pa nan.
Brand Manager di Non-Food & Personal Care di Martijn Trading, Sari Heinze, representando Libresse, cu ta para pa siguridad pa hende muhe pa nan por move facilmente y duna nan un tiki mas confiansa y siguridad den nan mes. Esey ta loke e marca ta para pe. Na esaki tambe ta mira con bon e ta pas pa loke ta e meta di Mary Joan Foundation, unda cu tambe a dicidi pa contribui na e causa, pasobra naturalmente esaki ta algo cu semper Libresse kier yuda na dje y tambe Martijn Trading ta contribui na dje, unda cu, conhuntamente, yuda tur persona cu ta miembro di Mary Joan Foundation of esnan cu ta famia di e miembronan di Mary Joan Foundation, cu un tiki mas sosten.
Libresse, den e forma aki ta contribui pa e T-shirtnan y tambe na final di e caminata lo bay tin algun goodies pa parti pa tur hende cu ta participando.