Diamars mainta dentista Hendrik Marsman a bay pafo di edificio di Parlamento pa haci un denuncia di loke e ta kere ta accionnan no etico di parti di su colega dentista y Parlamentario pa partido MEP, Arthur Vallejo. Tambe a papia di iregularidadnan den e sector di cuido medico aki di parti di instancianan oficial y e peliger cu tin cu un caso manera esun di Kawaiah por ripiti pasobra ningun hende ta para responsabel pa e fout cometi.
Marsman a cuminsa treciendo dilanti su puntonan tocante dentista Kawaiah. El a recorda con e, hunto cu otro profesional di e ramo diesocho luna pasa a para dilanti di edificio di DVG pa denuncia cu Kawaiah no tabatin su permiso na ordo.
“Mi a cana un caminda di cruz cu DVG, Jerry Staring, minister, coordinador…. Nunca ningun hende a yama mi of papia riba dje. Mi so a bringa diesocho luna y a culmina siman pasa den e detencion di e dokter aki. Y ta resulta cu e no por traha na Aruba”, el a comenta.
E ta considera esaki un berguensa pa Aruba cu un cos asina por a sosode y te awe nan a tene ningun hende responsabel na e instancianan di gobierno: DVG, Dienst Onderwijszaken y AZV tambe mester wak den spiel paso eynan tambe tin problema. “Bo no por confia riba DVG so, bo tin cu wak nan antecedente tambe; pero nan tur a laba man. Mi tin miedo cu e cos aki lo ripiti atrobe na Aruba si no tin cabes ta lora”, asina Marsman a bisa.
Ki ora cu e tabata reclama na AZV e entidad tabata sali na defensa y alaba Kawaiah na luga di haci un investigacion pa wak ki ta pasando. “Klakkeloos y blindelings nan a kere cu tur cos ta bon.”
Pa e relato completo y pakico e ta pidi retiro di Arthur Vallejo, lesa TREMPAN
