Marlon Sneek: Na luga cu gasto di personal baha cu 12 miyon el a subi cu 10 miyon

CFT a emiti un comunicaco di prensa relaciona cu presupuesto 2019 y na mes momento Parlamento a ricibi e conseho cu e comision di supervision a haci riba e presupuesto aki y lider di fraccion di AVP, sr Marlon Sneek ta mustra cu manera fraccion di AVP a bin ta mustra pa algun tempo caba, gobierno  usa e ‘crisisheffing’ pa financia su propio maneho.

Marlon Sneek: CFT ta exigi Gobierno pa corta

Posted by 24ora on Monday, October 22, 2018

 

“Un biaha mas ta Sali na cla ora cu nos analisa tur e informacionnan aki suministra pa CFT, cu gobierno actual a mal uza e crisisheffing cu el a castiga pueblo cune, pa financia su maneho.

E 125 miyon cu a bin extra aden no a wordo uza pa atende cu ningun crisis, ni social ni financiero y ora cu nos a kere cu gasto di personal ta bay baha manera cu nan a priminti y cu lo tin un suma di 30 miyon extra den caha pasobra no tin cu duna AZV esaki mas, cu lo bay tin placa pa baha debe, pero no, nan a gasta esaki tambe.

Esaki ta e realidad cu nos ta bibando y nos ta mira cu manera CFT a trece dilanti, ya for di inicio di e aña aki a pidi gobierno pa corta 12 miyon for di e presupuesto pa loke ta personal awor nos ta mira cu presupuesto di personal pa loke ta 2019, ta bay tin un aumento di 10 miyon florin mas.

Pues na luga di baha gasto nos por mira cu constantemente gasto di personal ta sigui subi, kiemen un gobierno cu a bati pueblo cu medida, awe un gobierno cu a redobla BBO, na luga cu nos mira un reduccion cu placa cu supuestamente tabata placa pa paga debe cu AVP a laga atras, awe nos ta cu esaki ta absolutamente cu no.
Esaki ta placa pa sigui gasta den friends and family, placa pa sigui cumpli cu tur nan amigonan, sigui nombra nan.

Nos por a scucha un prome minister bisa cu nan a kita 300 hende cu segun su persona tabata cana por nada, segun su persona di Mike Eman, awe nos por mira cu gasto di personal, ta mas halto atrobe, 10 miyon mas.
Splica pueblo e ora si gobierno a kita e 300 hendenan aki, ta con bin e gastonan ey no a baha y e splicacion ta facil, ta pasobra gobierno di prome minister Evelyne Wever Croes a pone mas di 500 hende den servicio di gobierno.

A pone cantidad di hende den servicio y awe e crisisheffing cu a suta pueblo cune, tin cu paga pa esaki y esey ta e realidad cu nos ta bibando y pa nos di AVP ta importante pa nos comunica esaki na comunidad pa motibo cu nos a priminti pueblo cu nos ta bay ta e wowo, nos ta bay ta orea.

Manera cu e informacionnan aki bira conoci y nan ta veridico, ya cu awe tur hende por lesa kico CFT a publica oficialmente,  ningun hende por bin bisa cu locual Marlon Sneek ta bisa no ta berdad, por a lesa esaki den medionan di comunicacion caminda CFT a haci e remarcanan aki.

Prome Minister a core Sali bin den prensa bisando cu nan a haya un ‘positief advies,’ absolutamente cu no, ya cu nos ta mira cu no solamente a pidi  pa baha gastonan cu a aumenta di personal, pero CFT ta pidi gobierno pa duna cuenta di e crisisheffing.

E 17.5 miyon cu gobierno a bisa cu ta pa atende cu crisis, por a mira cu nada di esaki a tuma luga y awor c’un aña a bula bay, no a gasta ningun cen y awor ta core traha un fondo pa hinca e placa aki den dje, pa despues bay hunga Sinterklaas cu esaki.

Nos por a mira cu CFT tambe a punta gobierno con a para cu e fondo ey, ya cu nan kier mas informacion riba e fondo ey, ya cu simplemente gobierno ta sluis for di un porta patras placa cu parlamento mester tin bista riba dje den un presupuesto, gobierno ta hinca esaki den un otro presupuesto caninda parlamento no tin grip.

Ta e tipo di practicanan aki nos ta condena.

Banda di esaki nos por a lesa tambe cu  CFT a bisa gobierno bon cla, cu shonnan, e cifranan cu gobierno ta uza, e entradanan cu gobierno lo bay tin e aña aki, no ta cuadra cu realidad.

Si nos mira y controla loke ta entradanan di 2018 tabata, awe nos ta mira cu locual gobierno tin poni cu lo bay ta e entradanan pa 2019, no ta cuadra cu realidad pasobra esaki no ta e cifranan, no ta e entrada cu gobierno ta bay tin.

Pues nos ta bay haya nos mes c’un presupuesto ficticio, un presupuesto cu tin cifranan den dje, cu no ta cifranan real cu lo bay hinca e pais aki den mas problema,” Parlamentario Marlon Sneek a declara.