Marlon Sneek: Mep a keda spanta

Ora c’un gobierno comete barbaridad contra un pueblo cu a wordo priminti un otro panorama cu loke gobierno a sigura tur hende, ta mas cu claro cu e pueblo aki lo cuminsa lanta y para firma contra di e abusonan aki.

ADV

Diabierna ultimo, un pueblo defrauda y decepciona cu su gobierno, a cuminsa mustra cu no ta tur hende tin miedo, cu no ta tur hende ta sucumbi pa presion politico di retiro di trabou y a haci uso di su derecho pa manifesta su disgusto.

Lider di fraccion di AVP, sr Marlon Sneek a mustra cu nunca ningun gobierno mester subestima e forsa di un pueblo, e decepcion c’un pueblo cu a wordo engaña a sinti ora cu ya caba gabinete Wever Croes a ranca 270 miyon for di cartera di pueblo.

Diabierna e prome aviso pa gobierno aki a wordo duna y mirando cu e abusonan di medida lo no caba por lo pronto, gobierno por spera pueblo un biaha mas riba su stupi, exigiendo un cambio, exigiendo pa e abusonan aki para.

Sr. Sneek tambe a mustra cu e manifestantenan ta hendenan cu a cana ‘sin miedo’ y por spera cu e miedo pa intimidacion- y amenasanan di gobierno, lo no bay stroba pueblo subi caya asina cu mas medida drenta na vigor.

“Na prome luga mi kier a grandici cada un di e personanan cu tabata presente na e manifestacion nacional, danki pa demostra curashi y balentia, cu apresar cu tin un gobierno cu ta intimida, oprimí y persigui su ciudadanonan, un gran mayoría a sa di tuma e curashi y laga nan bos rezona y bisa basta na abuso, basta na persecucion, basta na opresion y  e mensahe tabata cla y raspa pa un gobierno abusado y cu Aruba tin un pueblo cu lo no bay acepta mas medida y sigur no mas abuso.

Pueblo sinti Bo orguyoso di Bo mes, Bo a marca historia, Bo ta partí di e grupo cu ta forma partí di e glas mita yen, nos no a yega ainda caminda nos mester yega pero tin sigur cu nos lo yega ppa para e abusonan aki di un gobierno gañado.

Awe nos a kita e boeinan di e mannan di esunnan cu ta sinti nan mes intimida, cu tabatin miedo di subi caya pa no wordo persigui, pa tin un opinion deferente y asina vocifera nan disgusto.

Esaki tabata e comienso, nos lo sigui marcha cu pueblo, te ora no ta existí temor di persecucion mas, te ora nos tin e glas completamente yen.

Pueblo por tin e pleno confiansa cu partido A.V.P lo tey semper pa garantisa cu pueblo su inkietudnan ta wordo scucha y atendí.

Un pueblo cu a wordo engaña, tin tur e derecho di reclama, un pueblo cu a wordo priminti cu lo elimina parkeermeter y despues esaki no wordo cumplí, mester por tin e derecho di reclama.

Un pueblo cu a wordo priminti cu lo baha edad di pensioen y despues esaki no sosode, mester por tin e derecho di reclama.

Un pueblo cu a wordo priminti cu lo goberna sin medida y te cu awe ya tin 270 miyon di medida ariba su lomba, mester por tin e derecho di reclama.

Un pueblo cu a wordo priminti cu lo no paga “schoolgeld” mas y despues resulta cu e no a wordo elimina, mester por tin e derecho y reclama.

Asina nos por sigui cu e lista di promesanan cu a wordo haci y no a wordo cumplí.

Pueblo den Bo man e ta, pa laga nan scucha Bo bos, e prome paso a wordo poni, laga nos hunto sigui e caminda pa para e abusonan contra di pueblo,” lider di fraccion di AVP, sr Marlon Sneek a declara.

Comments

comments