Marlon Sneek: Ley pa CAFT funcciona legalmente ainda no a yega staten

Gabinete Wever Croes a sigura gobierno Hulandes y CAFT cu presupuesto 2019 lo ta na tempo y cu a presupuesto aki lo cumpli cu palabracionnan acorda caba y cu lo firma e protocol aki y lo cambia ley di LAFT cu ta duna CAFT un base legal caminda entre otro ta prolonga presencia di CAFT ta cu 2021.

Lider di fraccion di AVP Marlon Sneek ta mustra cu mientras cu e dianan ta bulando, e fecha ta acercando, no tin indicacion algun cu gobierno lo entrega presupuesto 2019 otro siman dia prome di september y tampoco e concepto di cambio di ley di LAFT a yega Parlamento pa wordo atendi y trata pa parlamento.

Un di e puntonan principal den acuerdo cu Prome Minister Wever Croes a yega cu Hulanda y CAFT, ta cu  gobierno tin cu bay reduci gasto di personal cu 12 miyon den presupuesto 2018 pero te ainda no tin indicacion algun con lo logra esaki.

“From day one, nos a bisa cu esaki lo no ta posibel, cu gobierno hamas lo por reduci un suma di 12 miyon florin den gasto di personal di seis luna.

 

AVP tin ocho aña den parlamento ta mirando cifranan di entre otro personal y nos sa cu esaki no ta posibel, sigur no a base di e storianan di ‘Roodkapje’ cu Prome Minister a bin conta di shete punto,  entre otro lo bin cu VUT, esunnan den overtolligheidspool mester bay traha, gobierno lo bay stop e periodieknan y tambe e sistema di haya un compensacion automatico.

Shete punto cu tur hende sa cu esaki lo no bay funciona, pues tira para sin contenido y nos a bise for di prome  dia cu e cos aki e lo no bay logre.

Awor nos por mira un gobierno cu a bin ta grita pa hopi tempo caba cu tin un crisis social, a duna e minister di asuntonan social 17 miyon supuestamente pa atende y soluciona e crisis social, e no a hasi nada. Awor kier core traha un fondo pa sconde  e placa aki den e fondo pa despues di eynan nan haci loke nan kier y pasa pret.

Fraccion di AVP a yega di mustra gobierno cu si no tin advies riba e asunto aki, nos no por para banda di e punto aki, ya cu e punto aki bin cerca nos, caminda ta duna specificamente kico y con ta bay usa e placa y awor ta bin bisa cu nos no por haci’e.

Manera mi a yega di bisa mas c’un biaha caba, esaki ta un gobierno incompetente y tin un nota di cambio caminda a specifica bon cla unda e suma di 17 miyon aki lo bay y di con esaki no a bay ainda ningun hende sa.

Di otro banda di con e tin cu bay den un fondo? Kico a pasa? E tipo di preguntanan aki nos tin, caminda un gobierno  incompetente cu ta cana saca potret y haci show pero nada di trahamento.

Esaki ta un gobierno cu a percura pa persecucion politico, a percura pa friends & family y banda di tur esaki, un gobierno cu ta tuma medida  contra pueblo.

Esey ta e tres cosnan cu nan a haci te cu awor y nada mas y awe por mira consecuencia di e incompetencia aki.

E minister awo ta pidi pa lanta un fondo pa e por usa su crisisplan pero ora cu e mester tabata na Aruba pa traha, e tabata na Venezuela ta keiro of na otro pais bebiando champaña y ta sigui keiro y pesey nan no sa kico pa haci.

Nan no sa con pa goberna y e gobierno aki a basa su mes riba crisis, usando nomber di  criaturanan tur caminda pero awe kico nos tin?

E berdad cu  nos tin awe ta un gobierno cu tin 10 luna sinta y ainda nos no por mira ningun tipo di cambio y e unico cambio cu pueblo por mira, ta cu su cartera a bira mas flaco,” Parlamentario Marlon Sneek a declara.