Gobierno saliente di AVP den un forma corecto manera mester ta, a haci un traspaso di gobernacion nobo na Gabinete Wever Croes y cual proceso a bay den un ambiente positivo y masha respetuoso.
Lider di fraccion di AVP den Parlamento, sr Marlon Sneek a mustra cu den medionan social y medionan di comunicacion por a mira con e traspaso aki a tuma luga entre otro caminda Minister Xiomara Ruiz Maduro a reuni cu ex Minister Richard Arends y tambe Minister Presidente Evelyne Wever Croes kende a reuni cu ex Premier Mike Eman hunto cu e otro Ministernan saliente, pa haci e traspaso aki den e forma cu e mester tuma luga.
Pa e motibo aki sr Sneek ta mustra cu ta di lamenta cu Minister Glenbert Croes ta duna un declaracion cu el a haya su oficina bashi sin computer y a agrega cu su gobierno a haya un caha bashi loke sin duda no ta e caso.”
Si mandatario Croes ta papia di un caha bashi anto lo ta su caha di placa na cas ya cu tur documento a wordo entrega, cu tur rapport financiero cu tin mustrando riba e realidad di e situacion cu tin na e momentonan aki.
Campaña politico a caba masha dia caba aparentemente segun e lider di fraccion di AVP, Minister Glenbert Croes ta sigui den e ambiente di campaña y a mustra cu lo ta bon e minister uza su energia pa ehecuta tur e promesanan haci na pueblo, manera entre otro cu e lo bay baha edad di pensioen bek na 60 aña pero awor ta declara cu lo forma un ‘comision’ cu lo bay studia e forma con esaki tin cu tuma luga.
Tur cos ta indica cu Gobierno nobo lo bay bira un ‘gobierno di comision’ ya cu ta mesun situacion tin cu e asunto di Aruparking, caminda partido MEP a priminti pueblo y comerciantenan den centro di ciudad den campaña, cu asina cu MEP drenta gobierno lo bay elimina e sistema aki por completo.
Parlamentario Sneek a mustra entre otro cu partido MEP a instiga comerciantenan den centro di ciudad pa lanta contra di Aruparking caminda entre otro a hinca e grupo di comerciante aki den sala di Parlamento durante di un reunion caminda entre otro por a mira e actual lider di RED, Ricardo Croes kende tabata grita den tribuna cu mester elimina e pagamento di parkeo den centro di Oranjestad.
Awe por ripara cu den e prome dianan di gobernacion di e gobierno nobo, ta papia cu pa e asunto aki tambe lo bay institui un comision pa bay studia kico lo bay haci cu Aruparking cu ta contrario na loke a wordo priminti den tur cas cu miembronan di MEP a bishita.
“Aki nos por ripara cu e lema cu MEP a bin cune durante di campaña electoral pa pueblo di cu gobernantenan tin cu “bisa loke nan ta haci y haci loke nan ta birsa,” cu esaki ya caba a wordo cambia pa e lema nobo di ‘bisa loke nan ta haci pero no haci loke nan ta bisa,” sr Sneek a mustra.
