Un ley di e magnitud manera e ‘coalitieheffing’ caminda gobierno ta bay ranca cerca di 150 miyon florin for di cartera di pueblo, ta bay den historia como un ey anti pueblo cu fraccionnan cu ta sostene coalicion y gobierno MEPPORRED, no a defende interes di pueblo na ningun momento/
Fraccion di AVE ley a yega parlamento diahuebs atardi y pa dialuna ya caba tur fraccion mester a entrega preguntanan cu nan tabatin cu ehecucion di e ley aki, pa asina gobierno contesta esakinan pa despues ora cu pasa e proceso aki, yama un reunion publico pa atende aprobacion di e ley.
Sinembargo ya pa dialuna merdia, pues den menos ocho ora di tempo, gobierno a contesta solamente 19 di e 235 preguntanan cu fraccion di AVP a dirigi na gobierno relaciona cu e ley aki, mientras cu e tres fraccionnan cu ta sostene gobierno, no a formula NINGUN pregunta.
Tampoco durante tratamento di e ley aki, miembronan di e tres fraccionnan aki a haci pregunta na gobierno relaciona cu e ley aki y ta algo cu fraccion di AVP ta cuestiona totalmente, sigur ora cu e ley aki ta bay mishi cu entrada di cada ciudadano riba e isla aki, caminda principalmente esunnan di menos entrada lo wordo confronta cu problemanan financiero formal.
Ta notabel e forma con gabinete Wever Croes a atende cu e ley aki, un ley di un magnitud y consecuencianan inmenso pero cu a wordo trata den e concepto cu e ex lider di MEP, Nelson Oduber a yega di menciona, esta manera un team di domino bou di palo.
Ora cu analisa tur e desaroyonan aki, ora cu a pensa cu a bulldoze e ley aki pa motibo di reunionnan di Parlatino cu a tuma luga den fin di siman cu a pasa, ta mustra awor cu e biahe di Prome Minister Evelyne Wever Croes, ta e motibo principal di e desaroyo aki.
Pa su prome bishita oficial na Hulanda, e Prome Minister lo a insisti pa hiba algo pa mustra gobierno Hulandes cu su gobierno si no ta ria pa tuma medida, cu su gobierno ta dicidido pa actua pa atende cu e situacion financiero di nos pais.
Cu e ley aki Minister Presidente Wever Croes kier convence Hulanda pa extende e acuerdo cu tin caba na vigor relaciona cu realisacion di un balanced budget, extendiendo e supervision financiero di CAFT.
Fraccion di AVP hasta ta carga e sospecho cu e tres fraccionnan di parlamento lo ta sostene Minister Presidente Wever Croes pa bay di acuerdo cu Hulanda pa Aruba perde su autonomia financiero y esaki cay bou di supervision permanente di Hulanda den futuro.
Algo cu ta di lamenta sigur ora cu ta mesun Prome Minister aki den oposicion a grita cu bos duro cu gobierno di AVP lo a entrega autonomia financiero di e pais cu e ley di LAFT cu a haci CAFT posibel, cual ley lo a yega su final e aña aki pero cu awor ta coriendo peliger di no cumplimento di parti di Aruba cu e palabracionnan haci.
