Marksonn Maduro ta un empresario hoben, cu a cuminsa su negoshi “Hoya” net awo cu Aruba a hay’e cu e reto di un crisis causa pa coronavirus. Esaki sinembargo no a kita e perseverancia cu el a cuminsa y yega na su negoshi. “Tur hende ta pasando den problema, negoshi a cay y haci negoshi mes a bira un reto grandi,” asina Maduro a cuminsa describiendo e situacion cu no solamente su persona pero comerciantenan en general ta pasando aden.
Tur hende ta trata di innova y bini cu cambionan, pero no por nenga cu economia ta stanca. “E volumen y fluho no ta mescos cu antes. Constantemente mester keda na re-iventa, innovacion, p’asina toch keda haya algo di cliente.”
A trata di bini cu conceptonan nobo cu den e crisis e clientenan por a pasa busca nan bebida preferi y sigui nan destino. “Hoya” tabata e prome pa cuminsa cu e sistema aki. Y inclusive a pone e sistema di entrega. Y tin productonan cu ta pone den ziplock. “E lockdown aki a pone nos innova hopi. A presiona nos pa cuminsa cu cosnan nobo.”
E ta kere cu tin un sistema cu ta funciona, sinembargo no tin un lista concreto di kico e comerciantenan por of no por haci. Pues tin un parti chikito cu ta mustra un falta di comunicacion.
“Si tin un maneho y tur hende ta riba e mesun linea, e lo ta miho organisa y nos tin cu sigui move.” E ta encurasha tur hende keda cas pa no tin mucho movecion rond, pero sigui apoya comerciantenan local.
