Siendo miembro pa hopi aña caba di Sociedad Interamericana de Prensa (SIP), organisacion mas grandi di prensa di henter e continente Americano, y siendo e Vice Presidente di e Comision di Libertad di Prensa di SIP, Marko Espinoza tabata un orador invita na e reunion di mita aña na Cartagena. El a dirigi su mes dilanti e 300 miembronan for di Canada, Merca henter Latino America y Caribe.
Na final tur a lanta para y a aplaudi e hoben periodista pa su balentia, su compromiso na informa comunidad y di keda fiel na su fuentenan. Asamblea Nacional di SIP a vota cu aclamacion di sigui e casonan di impunidad aki di cerca y pa keha Reino Hulandes na Corte Interamericana di Derechonan Humano, di no ta respeta Libertad di expresion na Aruba.
Miembronan di e sociedad internacional a keda sorprendi pa e cambio radical den cual ta trata miembronan di prensa na Aruba e ultimo dos añanan. Nunca den pasado a yega di haya tipo di kehonan pisa asina, den cual no solamente ta purba stroba trabou di prensa liber, sino awo dor di uza e poder hudicial pa purba silencia prensa critico!
No ta un, sino dos bez Gabinete Evelyn Wever-Croes a laga cera e hoben periodista Marko Espinoza, bou acusacionnan cu te dia di awe, mas di un aña despues, ainda no por presenta e caso dilanti un Corte imparcial. E prome biaha oficina di Minister Presidente Evelyn Wever cu ayudo di oficina di Minister Otmar Oduber a acus’e na december 2017 y na di dos ocasion tabata oficina di Minister Andin Bikker a acus’e na october 2018.
Den ambos ocasion, abogado mr. Chris Lejuez a defende su derechonan y te awe nunca mas a tende di Fiscal di Ministerio Publico riba ni e caso di supuesto “hortamento” di ekiponan di Gobierno, tampoco di supuesto “hortamento” di radio di Polis. Den e di dos caso a laga cera coleganan Maritza Tromp, Ross Tromp y Nelson Andrade. Ningun di e casonan aki a yega Corte ainda!
Den su discurso Marko Espinoza a comparti su testimonio den locual el a pasa aden, unda Polisnan di Landsrecherche a menas’e di deporta su mama y tata for di Aruba si e no divulga su fuentenan. Nan a purba di tur forma pa gaña riba otro declaracionnan pa purba haya un declaracion pa purba yega na prueba pa hustifica detencion di su mesun colega Nelson “Speed” Andrade.
Ta hopi obvio e sed di e Gobierno actual pa laga cera periodistanan cu ta mucho critico riba nan maneho of cu ta nan “amigo”. A purba den forma financiero pa obliga tur departamento di Gobierno y companianan priva di Gobierno pa abstene di pone propaganda via nos medio. A acerca comercio….si asina mes….Minister ta yama comerciante pa pidi’e pa no haci propaganda cu nos sino lo no otorga ningun permiso. Ora esey no a logra, a purba stroba nos di drenta Parlamento di Aruba, pa cual a bay Hues y nos a haya rason. Como cu nada ta logrando, pasobra nos media ta sigui crece tur dia….a dicidi di uza nos sistema hudicial pa persigui nos periodistanan.
Esaki ta un acto serio cu ta duda cu Reino Hulandes ta para tras di e maneho aki. Aunke cu den cierto forma, via Procurador General, ta permitiendo Gobierno pa cana e caminda aki contra miembronan di prensa, cu mundialmente ta liber pa eherce nan funcion sin wordo stroba dor di Gobierno.
Na october ta tuma luga e siguiente reunion di SIP na Merca, den cual lo suministra informacion actualisa riba e casonan di impunidad na Aruba. E organisacion mundial lo spera ki paso Gobierno di Aruba ta tuma, duna husticia su espacio pa termina cu nan “investigacion”. Pero si no presenta ningun caso y laga e detencionnan keda como “impunidad” lo escala e protesta aki na nivel mas halto. E asamblea nacional ta di acuerdo pa laga mundo sa di e maneho anti libertad di expresion cu awendia nos conoce na Aruba, dor di e Gobierno na mando.
