Prome Minister di Hulanda, Mark Rutte a pronuncia su mes riba e caso di malversacion na Arubahuis cu ex Minister Plenipotenciario, Guillfred Besaril ta sospecha di dje. Reconociendo cu e no sa mucho di e caso, e mandatario Hulandes a indica cu ta un asunto cu husticia na Aruba mester bay atende, pero cu ta fout pa un político haci maluzo di fondo publico.
E declaracion di Premier Rutte a bin na final di e conferencia di prensa cu habitualmente ta ofrece diabierna atardi post e Reunion di Conseho di Minister di Reino. Den sala di Nieuwspoort na edificio di Tweede Kamer, a contesta cu pa aworaki e no ta bay comenta concretamente riba e caso pasobra ta pa prome biaha cu e ta scucha y cu e lo mester profundisa su mes den dje.
E ta corda bon si di a sinta na mesa cu ex Minister Plenipotenciario Besaril y cu cualkier político cu ta haci maluso di un debit card, ta algo fout. A bisa acerca cu e mes no tin un y no kier tin un tampoco na su disposicion. “Si bo tin un cos asina, wel ja, percura pa bo us’e bon,” Rutte a expresa.
Ta for di 2022 cu, pa medio di un carta anonimo, personal di Arubahuis a alerta Prome Minister Evelyn Wever-Croes di asuntonan cu no ta canando bon y cu e ex Minister Plenipotenciario y candidato di MEP lo a haci su mes culpabel di dje.
Esaki a pone cu Premier Wever-Croes a pidi Centrale Accountantsdienst pa haci un investigacion cu a keda masa cuestiona di parti di oposicion. Recientemente Ministerio Publico a confirma cu e minister president di Aruba a entrega un keho formal tocante esaki.
For di reaccion di Premier Rutte por deduci cu Gabinete Wever-Croes II no a pone gobierno di Hulanda na altura di e desaroyonan na Arubahuis y en particular di Besaril, un persona cu cual su Gabinete a sinta na mesa na diferente ocasion y pa diferente motibo.
