Colombia dos aña pasa, a aproba Cannabis pa uso medicinal. Riba e pregunta si Prome Minister di Hulanda, Mark Rutte, ta mira Cannabis, su cultivo, su comercialisacion, como un oportunidad di negoshi y desaroyo di proyectonan productivo despues di e temporada di conflicto pa Colombia, el a contesta cu e no lo concentra riba e parti di Cannabis. Esaki durante un entrevista cu medianan acredita (entre otro 24ora.com) na su bishita na Bogota e siman aki.
“Por su puesto e ta un producto di campo cu tin un uzo medicinal. Pero di berdad, mi no ta un gran amigo di Cannabis. Mi a mira hopi di mi amigonan y nan yiunan keda tranca den e adiccion aki. Cannabis cu ta consumi awendia, no ta e mesun di mi generacion. No ta e mesun cu tabata wordo produci 30 of 40 aña pasa. Y e riesgonan pa bira adicto, ta hopi halto,” asina e mandatario a contesta.
E declaracion aki ta bini den e siman unda na Aruba a organisa un charla di cannabis pa uzo medicinal. E ta e prome paso den e proceso di legislacion. Manera tur hende sa, mayoria partido politico ta na fabor di legalisacion di cannabis (marihuana) pa uzo medico, pero solamente un partido politico (RED) ta na fabor pa legislacion pa uzo recreacional tambe.
Mientras cu Partido RED a anuncia cu legislacion ta na caminda, por nota con Prome Minister di Hulanda a anuncia cu e ta totalmente contra cannabis debi na mal experiencia den su seno di amistadnan.
Prome Minister Mark Rutte lo ta na Aruba na januari 2019 den un bishita oficial.
