Parlamento di Aruba ta e organo cu ta controla gobierno, pero bou mando di MEP esey no ta e caso. Momento cu a pasa presupuesto
Pa loke ta Serlimar tabatin un mocion cu ta pidi e rapport di investigacion di cual drs. Marisol Lopez-Tromp, lider di MAS, a inicia dos aña pasa y te ainda no a mira esey. E mocion aki ta pidi pa e rapport keda cla y e ta di acuerdo cu esey. Fraccion MAS kier mira con e rapport a finalisa. El a sigui splica loke a hinca den e mocion aki, tur punto di consideracion, hopi di nan no ta corecto of incompleto.
Ta bon pa subraya cu hopi cos a sosode den Serlimar cu no ta cuadra, cu no ta corecto. Incluso tin caso cu a sosode ta contra ley, procedura, etc., y varios biaha el a splica riba e puntonan. E consideracionnan no tabata completo y corecto. Hasta tin punto aden cu mester ta hopi mas amplia y splica, pa con grave nan ta den transcurso di aña y MAS a vota contra di esey, ya cu e informacion den dje no tabata cuadra.
MAS a asisti n’e presupuesto aki y e nivel di MAS tabata na nivel. El a splica cu nan no ta ofende hende, ta bisa e cosnan manera ta, si tin algo mester ta bisa ta hacie manera e ta. A ripara cu minister presidente y Minister di Finansa tin manera un hobby cu cada bes bin parlamento, esey ta bira nan speeltuin pa henter dia tira palabra, zundra hende, insulta, bully, atacha hende muhe den parlamento. El a sigui bisa cada bes ta Aquannette, su persona, Gerlien, Mervin ta haya tur sorto di insulto. Incluso ta bisa insinuacion cu no ta cuadra mes.
Ora cu minister ta na palabra, no por stroba nan pasobra mester laga nan caba pa reacciona. E tempo cu e parlamentarionan ta haya ta limita y ta uz’e pa cuestiona gobierno. Loke a mira den parlamento tabata un minister presidente cu a presenta den sala keriendo cu por call out parlamentario, puntra cos cu e ta haya cu nan mester contest’e. Pero e ta netamente robes segun e reglamento di ordo y cu e Presidente di Parlamento no ta mantene su mes na dje.
El a splica cu Presidente di Parlamento mester a par’e y bisa cu e no ta haci pregunta na parlamentario, pero parlamentario ta haci pregunta riba maneho di minister. Por a mira ora a trata e presupuesto supletorio, esaki a bay riba puro insulto. Despues di reunion coalicion a haya cos pa celebra, cual e parlamentario ta haya cu no ta co’i celebra pasobra e situacion na Aruba ta hopi serio.
