Marisol Lopez-Tromp (MAS): Un bes mas gobierno ta “get away with murder”

Segun lider di fraccion di MAS Marisol Lopez-Tromp: Pasamento di e ley di FASE ta pa purba evita cu e ministernan cu a haya nan mes cu rapport concreto di Centrale Accountant Dienst (CAD), wordo persegui penalmente. Rapportnan di CAD cu ta cla pa basta tempo pero cu ta te awo, mey ora prome cu e reunion publico cuminsa, parlamento a haya e rapportnan aki. Rapportnan cu ya tabata cla como un aña pasa!

Esaki ta pa evita cu personalmente por tene e ministernan responsabel pa cualkier acto prescribi den e rapportnan cu no ta segun ley. Den cualkier circunstancia, cualkier minister di cualkier asignatura lo a haya su mes cu consecuencia di esaki. Por ehempel den forma di investigacion, cu caso penal y e minister lo mester carga su responsabilidad. Pero pa e ministernan di MEP, si ta absolve esaki. 

Locual ta hopi duidelijk skirbi den e rapport aki ta cu votando pro pa e ley aki, bo ta legalisa cu forsa retroactivo tur loke e mandatarionan aki a haci robes. E ley aki ta pa tapa tur cos robes y contra ley cu e ministernan a haci cu placa di FASE e ultimo dos añanan. Fraude, abuso di poder y funcion, faboritismo y tambe corupcion, cu e articulo 9.2 den e ley, a legalisa tur e actonan aki. Votando pro pa e ley aki, a kita e responsabilidad ministerial di tur consecuencia di fayo cu e ministernan aki a comete. 

Ta bay un stap mas leu: a politisa FASE siendo cu e mester ta pa tur hende y tabata pa tur hende. Pero e forma con a core campaña cu ne door di partido MEP y e forma con e minister a vocifera cu tanten cu MEP ta den gobierno FASE ta continua, ta duna bo di conoce cu a uza FASE como un tool di campaña y a manipula e votadornan. 

Bisando esaki e minister a percura pa politisa y a pone cu e 3 mil y pico hende cu no a haya FASE por ta den incertidumbre di pakico nan no a hay’e. Te awe nan no tin claridad di esaki, mirando cu no por averigua den e sistema con a cambia e criterianan.

“Lesa e rapport bon y bo ta wak e motibo: e articulo 9.2 ta manera cu e ta y pa e motibo ey ta bai pasa e ley awe, y nos en todo caso ta vota contra”, asina lider di fraccion di MAS Marisol Lopez-Tromp a finalisa bisando.