Marisol Lopez-Tromp (MAS): Coalicion ta busca pa legalisa ‘friends & family’

Lider di fraccion di MAS, drs. Marisol Lopez-Tromp tin su punto di bista con e reunion di awe mainta a bay.

Den e reunion publico aki, Lopez-Tromp a menciona cu MAS a trece su punto di bista dilanti como fraccion y tambe como candidato individual.

Di parti di e fraccion, a propone pa medio di un mocion, p’e ley di screening aki no conta prome cu e candidato pa minister bira minister, pero pa sigui hacie tambe durante di e periodo cu e persona ta minister. Esey ta nifica por ehempel cada dos aña.

Por a mira den pasado cu tabatin candidato pa minister a bira minister, a pasa e screening bon y despues na caminda nan a haya nan mes toch cu problema di acusacion penal. Nificando cu si pa cualkier motibo nan lo a haci cos robes, si acaso tabatin e screening aki door di instancia cu ta respeta y tin experticio pa haci e trabao aki na caminda, esey por nifica cu den un periodo mas trempan, sea a adverti nan cu cos cu no ta bay corecto y lo por coregi of lo a comete cos robes, pa cual por tin un castigo penal, si acaso esey ta asina.

Historia a mustra esey, segun Lopez-Tromp. Tambe el a trece padilanti cu articulo 1 di e ley, no ta di acuerdo cu ne manera cu e ta awo. Mester keda uno cu henter e famia ta pasa door di un screening pa evita hustamente tipo di problema di friends & family cu por mira awor aki.

Loke ta pasando aworaki cu ta mira mas tanto cu ta conoci, primo, omo, famia, etc. ta drenta cierto funcion, te cu por a mira recientemente potret di un actual minister cu como cuater di nan como ruman den un reunion. Riba su mes no ta discutiendo su cada un ta profesional of no. Pero si ta discuti cu hustamente esey ta e punto cu tin den e ley pa preveni conflicto di interes.

Si aworaki tin un minister cu su casa a hala un banda pa su partner por bira minister, aworaki tin cuater ruman den un reunion, tin casa na bureau y esey si por. No ta algo cu lo kier promove. Kier evita cu ta haya situacion caminda cu un solo famia ta dirigiendo un pais. Den e caso aki, den e tempo cu nos ta bibando, por mira critica den campaña caminda hopi ta e famianan cu a trece e punto aki dilanti cu ta haya cu ta algo cu tin cu stop. Y aworaki ta mira e ley presenta awo, ta screen e candidato pa minister y su partner, eventual nan yiu y nan partner.

E no ta bay p’e situacion cu tin aworaki entre otro den Cocolishi y den mas hunta directiva caminda cu ta haya cierto famia, ubica strategicamente den cierto funcionnan y hasta riba un potret por a mira cuater ruman ta reuni, cada un cu diferente pechi. Hasta tin di nan cu tin mas pechi unda cu e bay. Esey ta punto cu tin cu evita.

Pa cobertura mas amplio lesa edicion di TREMPAN mañan.