Diabierna lo t’e ultimo dia di e reunionnan interparlamentario IPKO. Por mira bek na un siman caminda cu a cuminsa tene reunion di Tripartiet entre Aruba, Sint Maarten y Corsou prome. E temanan cu pa drs. Marisol Lopez-Tromp, lider di fraccion di MAS, a resalta fuera di e presentacionnan cu a haya, ta entre otro e rapport presenta cu ombudsman nacional di Hulanda, cu a laga haci dos aña pasa, mencionando e problemanan cu e studiantenan di nos region ta haya na Hulanda y cua t’e problemanan cu ainda no a resolve.
Un cu pa Lopez-Tromp ta kere y p’e studiantenan y nos region ta keda importante t’e asunto di BSN-Nummber (Burgerservice nummer), cu ta pone e studiantenan cu ta bay studia na Hulanda y cu tin cu haya nan camber, cu tin cu regla nan asunto, cu mester inscribi na gemeente, etc. y si no tin e number ey, ta un problema p’e studiante, impediend’e haci cierto pasonan cu e tin di haci como residente nobo.
Ta straña e parlamentario cu a publica e rapport aki den 2020, e kopzorgen di e studiantenan Caribense te cu awe ainda no por sali afo cu un solucion concreto p’e studiantenan pa loke ta e tipo di registro aki.
E ta importante, segun e parlamentario, pasobra e ta encera tur e prome preparacionnan cu un studiante mester haci ora e caba di yega y tur hende sa cu no ta facil pa tur di nan, ora cu caba di bay biba na Hulanda riba su mes. Si no tin e, ta impedi e studiante di regla cualkier asunto p’e mes como persona na Hulanda, cu ta keda un punto di preocupacion. A discuti esaki den Tripartiet y ta un di e puntonan cu Lopez-Tromp lo keda enfatisa na bienestar di e studiantenan pa nan concretis’e. Ta bisa cu ta teniendo diferente reunion, conferencia, cambio di ley cu lo mester bin, pero a pasa dos aña y ainda no a bin un solucion.
Esey Lopez-Tromp ta kere cu ta un di e temanan di importancia den e Tripartiet cu mester sigui tene na bista.
E resto di siman a sigui cu diferente topico cu no ta desconoci manera ‘geschillenregeling’ cu tin discusion pa basta aña. A haya diferente presentacion durante e reunionnan cu tabatin. A enfoca den e dianan cu a pasa riba entre otro riba asunto di sclavitud, cual tabata riba agenda.
Tambe a trata presentacion di entre otro persona di Raad van State cu tabata presente, persona cu a bin duna contenido riba varios topico y diabierna t’e clausura caminda cu lo mira ki afspraak lo concretisa.
E CANALNAN DI COMUNICACION
E parlamentarionan a bin Hulanda pa representa Aruba p’e reunionnan Interparlamentario caminda cu naturalmente ta prepara pa por papia y debati entre otro cu e miembronan di Eerste y Tweede Kamer. Ta consciente cu hopi biaha pueblo ta critica cu e parlamentarionan ta biaha
bay Hulanda. Segun Lopez-Tromp, sigur e tin un balor agrega.
Si mira cu hopi asunto cu ta sosode na Hulanda cu na Aruba ta sigui, pero e politico di Hulanda ta un grupo masha chikito ta sigui y ta den comision riba asunto di reino Hulandes.
Loke cu Lopez-Tromp kier bisa ta cu cualkier cos cu pasa cu ta toca nos hendenan sa y tambe asunto cu ta importante y cu ta dicidi riba nos na Hulanda no ta un grupo grandi di parlamentario cu ta enfoca den su totalidad riba dje. Ta un comision special ta haci esaki. Pa hopi aña ta trece padilanti cu kisas ta hopi importante pa percura pa tur e parlamentarionan Hulandes ta miho informa p’e situacionnan den Caribe.
A trece padilanti na Hulanda, cu tin hopi problema di nan mes andando, en particular despues di e crisis di Corona. Pero pa nos relacionnan den reino Hulandes, no solamente tin di discuti riba respet mutuo, autonomia, igualdad, etc. Pero hopi importante ta pa tene e canalnan di comunicacion habri.
Esey ta loke ta haci formal y informal ora cu e parlamentarionan di Aruba y e otro parlamentarionan di e paisnan den reino ta na Hulanda.
Diahuebs mes tabata un dia mirando e topico di educacion, Lopez-Tromp a bishita Haagse Hogeschool na Den Haag. A haya un recorido chikito, mira con e scol ta. Tin hopi hoben di Aruba a acudi y ta acudi tambe. A papia cu varios studiante eynan tambe.
A combersa cu loke ta yama un studiementor, pa haya un bista con ta wak e parti di studiante a bay antes y con e ta aworaki.
A toca tambe Arubahuis, cual a muda. E biaha aki no ta riba agenda oficialmente pa bishita. Fraccion di MAS ta pendiente un rapport di CAD pa sa su situacion realistico, financiero y di e investigacion cu a tuma luga ey nan.
Lopez-Tromp ta kere cu e ta keda un luga cu mester bin un claridad riba dje, den ki direccion ta bay reorganis’e manera cu prome minister a trece dilanti recientemente, pero te cu awe, parlamento no a haya oficialmente ningun relato of rapport riba dje.
Clausurando e bishita aki, Lopez-Tromp a indica cu diabierna lo tin e ‘afsprakenlijst’ y a base di esey por duna mas claridad kico lo palabra.
