Marisol Lopez-Tromp a sinti cu ta corupcion a haci cu nan no kier’e mas. Esey ta loke e mandatario di infrastructura, medio ambiente y desaroyo teritorial a comenta. Desde cu el a sinta, el a topa diferente situacion cu no ta bon den e ministerio cual e ta encabesa.
Tur minister por topa esey den di nan. Den esun di dje, el a hereda un situacion caminda cu tabata tin diferente caso cu mester a atende. Investigacionnan tambe cu mester a start den cierto departamentonan, cierto compania tambe, cu ainda ta andando.
No ta un paar, ta varios, segun e mandario, y a splica esey den parlamento tambe. Dia cu nan kier a retir’e na fin di juni, e mester a bolbe fo’i Hulanda, bin Aruba den un reunion pa atende mocion di desconfiansa contra di dje, e tempo ey e Parlamentarionan tabata bisa cu e reunion aki no tabata tocante di corupcion, cual Marisol Lopez-Tromp a bisa si e ta.
El a splica pakico el a haya problema den POR, pasobra e no tabata haci cierto cosnan cu a exigi na dje, cu no ta cuadra cu bon gobernacion. A splica esey ampliamente, pa nan compronde e situacion cu e ta aden.
No tabata facil y tin cu bisa cu e tempo ey el a culmina den casonan di corte hasta. Manera Parke Nacional Arikok cu UTV. Serlimar cu su surseance van betaling caminda cu Hues a duna rason pa asina evita cu e compania a bay failliet. Ta un di e motibonan grandi cu POR a uza contra dje.
Na e momentonan aki, tin mas caso den corte pendiente di e ex director di Serlimar. Asina tabata tin cantidad di caso cu a duna e mandatario rason, cu e pleitonan cu a cuminsa contra di dje, nan no tabata tin rason.
Tempo ta mustra tur cos. Den e caso aki, COVID-19 tin su partinan doloroso y malo pa e economia. E ta claro hopi dolor pa tur nos hendenan cu a perde famianan door di dje of cu a bira malo.
Esnan cu a perde trabao. Preocupacionnan grandi cu tin. Pero COVID-19 a revela tambe hopi cos. COVID-19 a revela cosnan prome cu no por a wak. Pesey den su ministerio a bin topa cu diferente situacion cu a pak aan y a keda pak aan, apesar di contratiempo. Esey ta e meta pa cual ta haci e trabao, pa sigura pueblo cu e por confia den nan cu si topa cu casonan cu no ta integro pa pak nan aan.
E parti di corupcion ta hopi importante pa pak e aan pa pueblo tin confiansa den nos sistema. Pa por garantisa e procesonan ta bon.
Esey ta e parti di confiansa. Si mester tin desconfiansa den e minister, su meta ta pa pueblo tin confiansa den su sistema y e lo lucha y bringa, cual e ta haciendo tambe, pa por haci cu e proceduranan, e departamentonan ta conta cu un proceso cu por garantisa integridad y caminda cu e no ta asina, ta actua.
Y esey a trece Lopez-Tromp den problema desde juni ultimo cu a pidi su retiro y cu despues na juli esaki a resulta cu no a haya e mocion di desconfiansa mas y a sigui traha den e caso aki pa e metanan cu tin stipula den e acuerdo di gobernacion.
