Marisol Lopez-Tromp a huramenta como minister

Dialuna mainta Marisol Lopez-Tromp a huramenta como minister dilanti di gobernador di Aruba. Despues di e audiencia cu gobernador y tur colega di conseho di minister cu tabata tey presente, e por a huramenta y den e caso aki pa sirbi nos pais un biaha mas como minister.

Mas di 10 aña despues, Lopez-Tromp ta asumi e funcion aki, despues cu Otmar Oduber a baha como minister di Infrastructura.

Tin un acuerdo di gobernacion. Esey ta loke cu Lopez-Tromp lo sigui cun’e. Ta drentando den e periodo caminda cu falta dos aña pa un eleccion. E ta nifica no solamente pa continua cu cierto trabaonan andando, pero tambe trabao y leynan pendiente y nobo tambe pa haci esakinan.

drs. Marisol Lopez-Tromp a huramenta como Minister

Aruba tin Minister nobo. drs. Marisol Lopez-Tromp a huramenta como Minister

Posted by 24ora on Tuesday, January 28, 2020

Naturalmente cu contribucion di un y tur, no solamente coleganan den conseho di minister, como tambe contribucion di prensa, pa duna opinion transparente na comunidad y opinion corecto.

Comparacion

Si compara antes y awo, loke ta sobresali ta un aspecto caminda cu hopi cos, no solamente a modernisa, esey ta logico, pasobra awendia tin social media, tin facebook, cual antes practicamente tabata iniciando.

Tabata hopi dependiente riba prensa skirbi. Awor aki tin un mundo mas grandi riba esey. Tin un aspecto mas grandi tambe cual ta nifica e transparencia cu a engrandece riba cada un di nos decision y actonan y loke ta haci pa eherce e funcion di minister.

Den e cuadro aki gobierno tin un enfasis hopi grandi riba e parti di integridad. Esey no ta conta solamente pa ministernan, e no ta conta solamente pa gobernacion. E ta conta tambe pa henter e aparato publico. E ta conta pa ambtenaar, e ta conta pa hefenan di departamento.

Tur esnan cu ta asumi un tarea caminda cu tin un responsabilidad pa presupuestonan y placa di pueblo. Esey ta un aspecto cu mester tin su enfasis riba dje, pasobra e ministernan ta bay parlamento y responsabilisa. Pero en realidad ta na final di un cadena di responsabilidadnan di diferente hende cu ta traha por ehempel riba un ley, ta traha riba un presupuesto, riba un plan, riba un proyecto y e ministernan na final ta carga e responsabilidad. Mester por conta cu henter un aparato cu ta tene su mes na reglanan di bon gobernacion.

Minister den tres gabinete

Marisol Juliette Lopez-Tromp a nace na Aruba dia 28 di september 1969. Desde 2009 e ta miembro di Parlamento di Aruba y for di 2017 den funcion di lider di fraccion pa partido Pueblo Orguyoso y Respeta (POR).

Anteriormente e tabata ministro di Gabinete-Oduber III y IV. Na inicio di su carera politico Lopez-Tromp tabata parti di partido Movimiento Electoral di Pueblo (MEP). E tawata miembro di Parlamento di Aruba di 1998 pa 2001. Den eleccion 2001 el ta logra 4708 voto riba posicion nr. 4 di lista di MEP. Den historia di Aruba e ta e hende muhe cu mas tanto voto personal. El a bira dos bes ministro di Aruba y entrante awe diamars di tres biaha.

Den Gabinete-Oduber III el a hiba cartera como Ministro de Infrastructura y Asuntonan Social di 2001 pa 2005. Banda di e cartera aki a tabata di 2005 pa 2009 ademas Ministro di Enseñansa y Vice Ministro-Presidente di Gabinete-Oduber IV. Na 2009 ora MEP a bay den oposicion Lopez-Tromp ta bolbe como parlamentario. Despues di a wordo kita for di partido MEP na 2010 e tawata miembro independiente den parlamento.

Na 2013 Lopez-Tromp ta uni na Partido di Pueblo Arubano (AVP). E resultadonan di eleccion tabata uno historico; AVP a gana diestres asiento.

Di 2013 pa 2016 e tabata presidente di Parlamento di Aruba. Despues di un incidente den parlamento na juni 2016 Lopez-Tromp ta bandona fraccion di AVP pa bira parlementario independiente pa di dos bes. Na 2017 e ta uni na e partido nobo, Pueblo Orguyoso y Respeta. Despues di e resultadonan electoral di 22 di september 2017 el a mantene su asiento den parlamento, unda e ta fungi como lider di fraccion pa POR.

Cu e retiro di Otmar Oduber como Ministro di Infrastructura y Medio Ambiente entrante 12 di december 2019, Lopez-Tromp a keda apunta como su sucesor, te cu su huramentacion awe diamars como Minister di Infrastructura, desaroyo teritorial y medio ambiente.