Awe e reunion di Parlamento, cu a cuminsa for di mainta caba, a tuma un rumbo cu coalicion no por a maneha. E realidad presenta y bon describi den un panorama hamas bisto den politica na Aruba, a haci cu Minister Marisol Lopez-Tromp a sali di e reunion cu mas sosten di locual el a drenta cu ne awe mainta 8:00am.
Despues di 12 ora eyden, e fraccion cu a pidi e reunion, esta POR, a sinti cu nan no tin sosten ni den nan maneho ni den nan intencion pa baha nan mesun Minister. A pidi Presidente di Parlamento pa pospone e reunion “te proximo aviso”. Cu esey Lopez a crece mas y partido POR a haya un otro sla duro, kibrando nan credibilidad mas ainda.
Con ta sigui awo? Esey ta e pregunta miyonario sin contesta ainda. Despues cu Minister Marisol Lopez-Tromp a describi con e partido ta funciona, a parce mas bien un organisacion criminal. E mesun parlamentario tin contract di 34 mil florin pa luna cu Serlimar. Minister Bikker a cera un contract cu doño di e corant Diario pa 1.3 miyon florin sin bay destaho publico y contra tur conseho di departamentonan di Gobierno. A splica cu Otmar Oduber a kita di Minister pero awo a bira consultant y kier maneha e partido awo como comerciante y si no cumpli cu su “ordo”, cu mesora ta bin presion pa baha Bo como minister.
Por a sinti di trempan cu ni MEP ni RED no tabata sigur na cua banda nan lo para den e debate. Encuestanan online riba 24ora.com a mustra mesora tambe cu e comentarionan mayoria tabata na fabor di e Minister cu Parlamento kier a baha pasobra el a para pa integridad y a para corupcion. Esey a pone cu coalicion a hay’e bou presion enorme y no por a sali afo. A reuni pa un bon tempo den Cocolishi, cu tur Minister den sala di reunion, pero no por a yega na unanimidad.
Pero awo ken lo perde cara? Di un banda Minister Marisol Lopez a gana e bataya y por subi avion bay bek Hulanda cerca su yiunan. Pero atras Minister Presidente Evelyn Wever ta keda cu un Gobierno cu hopi prueba di corupcion y conflicto di interes….dificil pa sigui dilanti asina!