Lider di Fraccion di POR, Marisol Lopez-Tromp, a informa cu diahuebs awo ta inicia tratamento di presupuesto 2018 den Parlamento.
E ta anticipa cu lo bay tin debatenan interesante den Parlamento y Fraccion di POR ta preparando su mes totalmente pa e reunion publico aki. Un area cu sigur lo haya hopi atencion ta relaciona cu e deseo di hisa e calidad di bida di nos hendenan cu ta biba na Aruba.
Tin hopi forma pa haci esaki na un manera structural. Un di nan ta pa yuda esnan di menos recurso pa por yega na un vivienda pagabel. Otro ta pa eleva e nivel di calidad di nos enseñansa, y tambe por wordo logra door di traha den e parti social cu ta e curason di nos comunidad.
Miembro di e fraccion blauw a elabora mas detayadamente riba e ultimo punto aki cu ta e parti social,. El a expresa cu gobierno a bay di acuerdo cu un plan social di crisis caminda cu lo a ubica 17 miyon Florin e aña aki pe, cual ta un indicacion claro di e importancia cu nos hendenan tin pa e actual gobernacion.
E seriedad di e situacion ta wordo ilustra den e presupuesto unda ta pone e placa y ta destine pa entre otro topiconan manera prevencion, ayudo trempan pa casonan di famianan, hobennan, muchanan, babynan cu ta pasa den maltrato, etc. E area aki lo haya un suma di mas o menos 4 miyon. Ayudo curative y represivo pa casonan ora por ehempel tin violencia domestico, ora tin mester di un crisisopvang pa cu departamentonan manera Voogdijraad, Hende Muhe den Dificultad, Asuntonan Social, Sostenemi, etc. Tambe pa programanan pa guia hobennan y coach mayornan. Nan tin un suma di aproximadamente 10 miyon Florin. Igualmente tin ayudo pa muchanan y hobennan special unda tin 24 ora pa dia cuido di verpleging pa muchanan cu tin handicap multiple. Presupuesto pa esaki ta di 3.5 miyon Florin.
E aspectonan aki, lamentablemente, a wordo hopi neglisha den e añanan cu a pasa y aworaki gobierno ta poniendo tur atencion na esaki . Pa Fraccion di POR e parti aki ta hopi importante, pero mas importante ta pa gobierno cumpli cu e palabracionnan cu a haci cu e area social, e area huridico y tur otro cu tin di haber cu e topico social.
Esaki ta di vital importancia debi cu gobierno anterior no a enfoca suficiente riba e area social cu a conduci cu awe tin listanan di espera na diferente departamento. Pa duna algun ehempel Marisol Lopez-Tromp a menciona Voogdijraad cu tin un lista di 120 mucha; Departamento di Asuntonan Social tin un lista pa muchanan di practicamente 2 luna, na Sostenemi un lista di casonan wardando di casi 110 mucha. “Tur esakinan ta aspectonan cu ta bay cambia una bes cu e presupuesto wordo aproba y tur hende atene nan mes na e palabracionnan haci cu e proyectonan, cu e plannan, cu e coachingnan, cu e ketenzorg, etc”.
Lopez-Tromp ta agrega cu loke kier ta pa nos pais, nos casnan, nos scolnan ta sigur pa nos muchanan y pa nos hobennan pa asina tambe cu e tratado di mucha riba e topico aki.
Prevencion tambe ta un punto cu fraccion di POR kier enfoca riba dje pa prome cu un problema bira grandi, ya caba por actua y asina evita cu por bira casonan cu lo lamenta den comunidad.
Un rapport di Departamento di Asuntonan Social representando e diferente instancianan den e area ta indica cu un parti importante pa prevencion ta elimina tur e retrasonan cu tin, e listanan di espera y activa tur esnan cu ta den e cadena p.e. scol, cas, bureau leerplicht, Cuerpo Policial, parti medico. Pa cada un di e partinan tin tur e hermentnan cu nan mester y un bon comunicacion pa por cumpli y evita casonan grave y por intermedia na tempo.
Den e dianan nos dilanti Marisol Lopez-Tromp lo bay enfoca mas riba e topico aki cu ta di interes pa henter comunidad.
