Marisol dancers a duna un show fabuloso durante apertura di campeonato di softball

Aruba Softball Bond y Comision Organisador tabata tin un tremendo campeonato internacional di softball femenino.

Aruba pa promer biaha den historia tabata “sede” pa e di XIII campeonato internacional WBSC Suramericana (CONSURSA). Un total di 6 pais y mas di 170 persona tabata na Aruba pa e campeonato aki.

Riba nivel di Directiva Internacional e Presidente di WBSC Suramericana Sr.Antonio Morales di Colombia, Tesorero di WBSC Internacional Sr Javier Anaya y esposa, miembro di Directiva WBSC Srta Maria Soto di Venezuela, Vice presidente di WBSC Suramericana Sra. Marisa Matzuda di Peru, Diputado di Bonaire Sr. Edsel Cecilia, Parlamentarionan Shailini Tromp Lee y Sue Ann Ras, representantenan di Romar Trading Betto Wernet y Bryan Maduro ta entre e invitadonan cu tabata presente mas tur e atletanan y sigur e publico grandi cu a atende e ceremonia di apertura.

Durante e ceremonia aki e grupo di baile di Marisol Peña a presenta 20 minuut none stop di un show di baile spectacular den combinacion cu steelpand Nico Conner.

Un show hopi varia unda durante e show cual porcierto tabata riba tereno di bala mei mei di tur presente bailarinanan tabata cambia vistuario den e dugout cu a wordo prepara pa nan y cada ves tabata sali masha impresionante.

A baila diferente canticanan folklor y cultural, por ehempel baile di cinta etc y finalmente a sera cu trahenan espectacular di carnaval y a trese un ambiente unico mei mei di tur invitadonan. Representantenan di WBSC Suramericana y WBSC Internacional kendenan tabata presente tabata tin palabranan di elogio so y a keda masha hopi encanta cu e show cu e Comision Organisador a pone den otro cu fondonan hopi limita cu nan ta dispone di dje.

Un standing Ovation na final di e presentacion y bunita tabata pa mira atletanan di tur pais cu tabata participando Argentina, Brasil, Curacao, Peru, Venezuela, Aruba tabata jump y goza cada momento di e bunita show. Un palabra di pabien na Marisol Peña y sigur un palabra di pabien na cada un di e dancersnan cu a baila durante e magestral show di apertura.

Canal 22 a percura pa e live streaming cual signal tambe a wordo retransmiti pa WBSC kende tin acceso pa tur 5 continente rond mundo y asina mester remarca cu mundo henter a goza di e bunita show di apertura aki. Aruba ta orguyoso di cana un cu a pone su granito de arena pa por a logra esaki. Pabien sigur ta bay pa Marisol Peña y su Dancers. Sigur e tabata un “WAW”!!!