E hoben studiante Mariah Croes a cuminsa su periodo di “stage” na Kabinete di Minister Plenipotenciario di Aruba na Merca, situa den mesun edificio hunto cu Embahada di Reino Hulandes na Washington DC. E ta un studiante di Universidad di Aruba, na e facultad huridico.
“Pa mi ta un placer, pero alabes un deber civico di por guia y traspasa conocemento na nos hobennan cu awor ta studiante, pero cu mayan lo ta profesionalnan bon prepara di Aruba”, asina Andy Lee, Minister Plenipotenciario di Aruba na Merca a duna di conoce.
Manera ta conoci, Andy Lee ta terminando su ultimo lunanan di su contract como Minister Plenipotenciario di Aruba na Merca. Aunke e titulo ta di un Minister, e realidad ta cu e trabou ta na Embahada di Reino Hulandes na Washington y tin un tinte diplomatico mara na un contract cu Ministerio di Relacionnan Exterior di Reino. Ta pesey cambio di Gobierno no ta afecta e funcion aki. E contract ta vence na luna di juni proximo. Gabinete Wever-Croes lo postula Joselin Croes pa e funcion, pendiente aprobacion di Hulanda. Mester bisa cu tur e otro Ministernan Plenipotenciario na Merca tabatin un preparacion di Relacionnan Exterior, locual no ta e caso cu abogado Croes.
E Embahada di Reino Hulandes na Washington ta situa na 4200 Linnean Avenue NW na Washington DC. Nan ta habri di dialuna pa diabierna for di 8:30am pa 4:30pm. Actualmente e Embahador di Reino Hulandes na Merca ta Henne Schuwer. Separa di e Embahada na Washington, Reino
Hulandes tin diferente Consulado situa na New York City, Miami, Chicago y San Francisco. Reino Hulandes tin un Consul Honorario tambe na Houston.
E residencia di e Embahador di Reino Hulandes na Merca ta casi un paleis, e ta un di e residencianan mas grandi den e area y ta e residencia di Embahador di mas grandi di Reino Hulandes na henter mundo.
Haci bo best
“E bara ta halto poni, pero mi ta sigur cu Bo lo por maneha e reto aki manera tur otro stagiaires prome cu Bo”, asina Minister Lee a finalisa bisando.
