Maria College MAVO: Un total di 98 for di 103 candidato a slaag!

1279

Diahuebs anochi, Maria College MAVO a tene su anochi di graduacion. Un aña yena di reto debi na e situacion di Coronavirus. Angeline Rozenstand, Director di e scol, a splica cu un y tur a siña hopi den e temporada aki, mirando cu e habilidad pa adapta na cambio ta escencial den trabao, pero tambe cerca e muchanan.

Manera cu informa nan tambe, cu pa nan awe nan a ricibi un yabi magico. E yabi cu nan a ricibi, ta bay habri hopi porta pa nan den futuro, mirando cu nan edad hopi hoben, a siña adapta na un cambio den e crisis. Mundo ta cambia constantemente y tin cu siña cambia hunto cun’e, Rozenstand a splica.

Maria College MAVO: Un total di 98 for di 103 candidato a slaag!

Maria College MAVO: Un total di 98 for di 103 candidato a slaag!. Click link pa mas https://24ora.news/3iTh2h8

Posted by 24ora on Friday, July 10, 2020

E scol ta contento cu e resultado

Pa prome biaha nan tabata tin e grupo di arte cu a logra slaag 100%. Tambe a logra tin un mentor cu a haci 30 aña den servicio y su klas tambe a slaag 100%. En total tabata tin 98 graduado di 103, y a slaag cu 95%. E siguiente aña, e team ta trahando hopi duro. Ta haciendo tayernan pa bay over riba Google Classroom y tambe ta prepara e plataforma, pa e ora prepara pa si bin e siguiente periodo di crisis, pa por bay e ora digital online.

Segun Rozenstand, e docente ta guia e muchanan, caminda nan ta haya tutorials y na e mesun momento cu a cera e aña escolar, e muchanan cu no tabata tin e medio pa bay les online, a bin cu un grupo chikito scol y esnan na cas simultaneamente tabata haya les via Google Meet. Esaki ta e parti di e era nobo.

Mester ta hopi creativo si, pasobra e inversion no ta wordo hinca den e material. Mester tin esey. Pero mester toch ta creativo y wak con por bin cu solucion pa loke ta e muchanan. Ta gradici e mayornan, e team dinamico di Maria College, principalmente e graduadonan. 

Stacey Romero

Stacey Romero ta un di e graduadonan di Maria College MAVO. Pe e aña aki tabata uno basta dificil, mirando e situacion cu Aruba a pasa aden. E mes ta un ex studiante di Colegio Arubano y a tuma diferente ruta, cual ya caba esey tabata dificil p’e. Pero el a logra su meta y a surpasa pasobra e tabata tin su mayornan hunto cun’e cu a dune sosten. Cu e situacion di Coronavirus, e tabata mas fastioso, pasobra no a spera un situacion asina. Mester a djis sigui pusha, custuma cu e situacion y asina Stacey a logra. E mes ta bay Colegio bek y si tur cos ta bon, e ta cab’e tambe.

Kico ta motiv’e

Aña pasa el a cay masha duro mes. E no a logra Colegio den un solo tiro, pero e biaha aki su motivacion ta pa cab’e y lo bay logr’e. Stacey mes ta pensando ainda kico ta e trabao unico special ey p’e. E mes gusta papia cu hende. E gusta conseha. Por ta e por bay den e rumbo ey den futuro. E ta contento si. E ta excited pa sa di su futuro kico ta bay pasa cun’e. Tanten cu e tin su famia, su mama, su tata y su rumannan, e ta bon.

Justin Muyden

Justin Muyden ta un otro studiante cu a gradua na Maria College MAVO. E ta conta cu en berdad e tabata den un klas onrustig. Sinembargo nan a mustra cu nan tabata por. E tabata tin su ups and downs. Pero for di cada un docente cu el a haya den e cuater añanan, el a siña algo y a tuma for di nan tur un tiki, te cu el a bira e persona awe. Danki na nan e ta gradici e docente, door di nan pasenshi y tur cos cu a duna na dje, el a slaag. Tabata e miho cuater añanan di su bida te awo y ta hopi contento cu esey.

Siguiente paso

Awor aki Justin ta bay EPI den direccion di Economia. Despues di esey e tin pensa di bay afo. Pero ainda falta basta. E ta conociendo su mes como persona y pronto e lo sa sigur.

Conseho di Justin

Justin ta conseha e studiantenan pa purba di bay scol mas tanto posibel. Tin amigo ta leuk, pero na final bo lo tin diploma den bo man of no. Pero haci bo best, tende di e docentenan. No purba di ta rough of e payaso di klas. E tin su bon y e tin su malo, e ta splica. Justin sa di experiencia. E klas cu e tabata tin tabata uno druk. Djis enfoca riba e lesnan, pasobra na final ta bale la pena. Pa tin un diploma den bo man ta un feeling hopi dushi. Djis purba pa yega e meta.