Diahuebs a tuma luga un actividad deportivo, pa ta specifico di futbol, organisa pa di cuater aña consecutivo pa Edward Franken di Maria College MAVO, entre teamnan di e scol mes.
El a menciona cu varios mucha di Maria College ta den seleccion cu a bay den exterior, tin muchanan cu ta hopi bon den futbol. Por ehempel Roland Tromp, kende no ta un figura desconoci den deporte.
Pa loke ta e ambiente esey tabata tey y e alumnonan semper ta on manera cu organisa e wega, nan ta inscribi. Tabata tin cinco team cu a participa. Por a wak cu ta basta futbolista tin na Maria College cual ta hopi great.
Tin dos docente di gym cu a yuda den e organisacion y setup di henter e evento y ta duna Franken green light pa sigui cu esaki. Nan ta esnan cu ta para referee. Ta trata di docentenan Hubert Solagnier y Romar Arendsz. Maria College ta conoci pa semper traha den un team y cual ta resalta.
E preparacion a bay bon. Ta avisa e muchanan dos luna di antemano y ta bay cerca Franken y ta scoge nan color y prepara pa bay veld.
A haya basta sponsor, segun Franken. Tin Aruba Watersports, Splash Park, cu a sponsor cu premio pa e team ganado. Tin Protech, cu tambe ta sponsor. Tin Total Cleaning y Tropical Bottling. Manera cu a bisa nan cu ta trata di futbol, nan a bay on.
Franken a menciona cu ta gradici na tur e sponsornan, como tambe su coleganan cu semper ta coopera cun’e y tambe e docentenan pa motiva e muchanan, como tambe nan mes, sin nan no tin wega. Ta danki na e alumno y ex alumnonan cu a join e team. Asina aki nan ta engrandece e futbol di Maria College.
E resultadonan ta como lo siguiente: Team di futbol ganado ta esun di Roland Tromp, cu a gana 5-3 contra di e team di Nathan Franken. E wega a gana den un penalty.
Palabra di felicitacion ta bay na henter e scol cu a sa di respalda e alumnonan/deportista cu a participa den e tremendo evento deportivo aki.
