Marco Berlis (MEP): Ta positivo cu turismo ta sigui crece y fortalece pais economicamente

Recientemente nos por a ripara un biaha mas con nos turismo ta creciendo y kibrando record tur luna. Un biaha mas minister Dangui Oduber, su team- y profesionalnan den turismo ta logra otro record den e luna di december 2022. E recuperacion di nos turismo di december 2022 compara cu december 2019 ta di 111%.

Esaki ta un indicador cu e vision di minister Oduber, su team, ATA y e profesionalnan ta uno cu lo por sigui record pa e luna aki di januari 2023. Nos tur por recorda con turismo a perde e momentum momentariamente pa via di Omicron na comienso di aña 2022. Esaki a haci cu tabata tin basta cancelacion di reservacion haci na e hotelnan. Naturalmente esaki a afecta e resultado di nos turismo den cuminsamento di aña pasa.

Ademas, e resultado final pa 2022 pa loke ta e stayovers a logra un recuperacion di 98.4% versus 2019. Ademas AHATA a cera cu un recuperacion di RevPar di 99.7% na 2022 compara cu 2019. Asina Aruba por ta orguyoso cu nos grado di recuperacion di nos turismo pa e aña henter di 2022 ta di 98.4% compara cu 2019 cu tabata un aña record y historico pa nos dushi pais Aruba. N’e mesun momento Banco Central di Aruba a midi un crecemento di 18% durante kwartaal un te cu kwartaal tres di 2022. Adicionalmente e “tourism credit” tabata 3.2 biyon florin. Esaki ta un crecemento di 500 miyon florin na 2022 compara cu 2019.

Asina Aruba a cera di un forma sumamente satisfactorio y positivo, considerando e resultadonan grandi di nos unico pilar economico di turismo. Ta mira aña 2023 cu e wowonan alentador y yen di speransa cu nos lo sigui crece, y fortalece nos pais economicamente. Hunto cu e esfuerso y positivismo di cada un nos ta bay logr’e. Un pabien en general na tur esunnan cu ta traha den turismo y ta e cara di nos pais. Pabien Aruba!