Mas reclamo y clamor pa ayudo y intermediacion ta sigui drenta di parti di pueblo. Den e ultimo simannan mi a cuminsa confronta y vocifera varios caso di abuso laboral publicamente, mi a haya masha hopi hende ta acercami pa ayudo, conseho y solucion pa nan caso particular. Cada caso ta diferente y mi mester bisa cu tur ta contene un of otro forma di abuso laboral, ta locual parlamentario Berlis a expresa.
E problema ta cu aunke nos ta biba den aña 2022, un era moderno y cu hopi ley cu ta protege e trahadornan aki na Aruba, ainda tin hopi empresa cu kier impone sclavitud y abuso moderno riba nan trahadornan. Tur esaki ta sucede mientras e negoshi ta sigui prospera pero e derechonan y salario di e trahador ta wordo trapa of cambia di un forma inhusto y ilegal.
Ora cu e casonan aki a yega cerca mi, inmediatamente mi ta inclui nos hurista di fraccion pa por asisti e diferente casonan cu a presenta. Esaki ta necesario pa por guia e caso segun ley y asina e victimanan por wordo asesora corectamente. No tin mester pa paga pa e ayudo huridico aki pasobra como parlamentario mi ta un representante di pueblo. Esaki kiermen cu mi lo lucha y para cu pueblo den e tipo di abusonan ilegal aki, cu lamentablemente ta sucede basta frecuentemente alrededor di nos isla. Tin biaha e problema ta proveni di doñonan pa managers abusivo cu ta malusa nan autoridad y poder riba nan trahadornan.
Hopi biaha nan ta manipula den nan salario, ta maltrata e trahador, ta pone hende traha overtime sin pago, ta kita dia liber y no ta paga overtime y mucho mas. Si abo ta pasando un caso di abuso laboral y ta sinti cu bo mester di ayudo pero no sa kico pa haci, skirbimi of yamami libremente pa un cita y asina hunto nos lo traha riba un solucion pa esaki. Bo por conta cu mi!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
