Marco Berlis (MEP): Muha mata ora solo ta bahando pa menos awa bay perdi

For di aña pasa e prijs di e bari di petroleo a cuminsa subi. Na februari e guera entre Rusia y Ucraina a cuminsa y a impulsa e prijs di crudo mas halto ainda. Na december 2021 petroleo a cuminsa baha di prijs y pa e motibo aki WEB su expertonan a conseha gobierno pa no hedge ainda. E conseheronan semper ta observa y analisa e tendencia di e prijs cu tabata bahando y a pensa cu esaki lo baha mas ainda. Sinembargo despues di e consehonan aki por a ripara cu e prijs di e bari di petroleo a haci net lo contrario; el a cuminsa subi. Durante di e lunanan cu a pasa, WEB Aruba NV a cuminsa absorba e aumento den e prijs aki, sinembargo e compania ta considera cu nan a yega un punto cu esaki no ta sostenibel mas. P’esey a manda yama WEB Aruba NV pa bin Parlamento di Aruba algun siman pasa y splica esaki pa medio di un presentacion y cu cifranan alcaso. Mester remarca cu prijs di awa y coriente a subi na nos hermana isla Corsou for di mei 2022 caba.

Kico e consumidor por haci pa por acapara cu e tarifanan nobo?

Enbista cu lo aumenta e tarifanan temporalmente, pa via di e aumento di e prijs di petroleo, e consumidor por ahusta e forma con e ta haci uso di awa y coriente.

Con nos por spaar awa?

  • No laga e kraanchi di awa habri ora di skeiro djente, ora ta habonando of laba cabey ora di baña.
  • Muha mata ora solo ta bahando. Asina menos awa ta bay perdi.
  • Ora di laba auto, uza un hemchi cu awa y habon pa hawa e auto. 
  • Ora di laba co’i kibra, yena e baki cu awa y habon pa laba y despues yen’e cu awa pa hawa tur cos. 

Con nos por spaar coriente?

  • No laga fan of otro aparato di coriente cendi sin tin mester.
  • Paga tur luz trempan y paga luznan den camber of baño cu no ta wordo uza.
  • Limita e uzo di airco. Por pone airco na timer pa asina por controla e oranan cu ta haci uzo di esaki.
  • Pone e airco na un temperatura di maximo 22 °C. Mas abou e temperatura ta, mas coriente lo gasta. 
  • Laba paña riba cierto dia(nan) so. Controla y uza e midi di awa cu mester pa e cantidad di paña.

Manera tur otro pais rond mundo, Aruba tambe a hay’e cu aumento di awa y coriente. Laga cada un di nos ta mas consciente di e uzo di esaki,  pa asina nos por controla e gastonan cu e tarifa aumenta ta trece cu ne.   
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!