Marco Antonio Solis a yega Aruba

Mañan diadomingo ta tuma luga e concierto di Marco Antonio Solis den Harbour Arena, cuminsando for di 7:30pm. Pa simannan largo a anticipa e evento aki, cu sin duda lo conta cu un audiencia grandi di amantenan di bon musica y di un cantante di renombre mundial, manera Solis. E ultimo aki a tene un concierto na Miami algun siman pasa, cu a conta cu varios Arubiano den e publico.

Awe Marco Antonio Solis a yega Aruba for di Colombia den su avion priva, hunto cu su casa y yiunan. E lo presenta cu dos di su yiu muhenan mañan durante e concierto.

E jet priva cu a trece Marco Antonio Solis y su famia for di Colombia pa Aruba awe tardi laat.

E evento ta organisa pa e conocido promotor Steve Hudson di Corsou. El a caba di cosecha hopi exito cu e concierto na luna di mei ultimo di Ana Gabriel den Aruba Entertainment Center. Pa otro aña ya caba e tin dos evento programa, treciendo artista y bandanan grandi pa Aruba. Hudson por sirbi como ehempel pa hopi otro, den con organisa conciertonan grandi, cumpli cabalmente cu impuesto, anto sin conta cu patrosinio, manera otronan si tin e “suerte” di haya semper.

Autonan special wardando riba salida di e cantante procedente di Mexico, cu ta programa pa canta casi dos ora mañan den Harbour Arena.

Marco Antonio Solis a cuminsa su carera musical cu 6 aña di edad, cantando cu Los Hermanitos Solís. na aña 1975 el a funda Los Bukis hunto cu otronan y den e banda e tabata e cantante principal y guitarista. Sinembargo e banda e kibra despues di como 20 aña di exito. Solis a sigui su so como solista. El a lansa su prome album “En Pleno Vuelo” na aña 1996.

Marco Antonio Solis y su dos yiu muhenan durante un di su conciertonan na Merca. E tour actual a pasa varios pais Latino Americano y Merca. E ta sigui otro aña riba e mesun tour aki, “El Mas Querido Tour 2019”.

Marco Antonio Solís Sosa ta naci na Ario de Rosales, na Mexico, dia 29 di december 1959, pues lo cumpli 60 aña di edad otro luna. Desde aña 1970 e ta activo musicalmente. E ta casa cu Cristina Salas desde 1993 y e tin 4 yiu. 

Solis a gana 4 Latin Grammy Awards, a gana 2 Premio Lo Nuestro y 1 strea riba e Hollywood Walk of Fame, mientras cu a inclui’e tambe den e Billboard Latin Music Hall of Fame.

Algun ora pa Marco Antonio Solis subi stage riba The Harbour Arena

Posted by 24ora on Saturday, November 9, 2019