For di unda duresa di curason ta bini, of miho bisa for di unda un curason duro ta bini?
Awel e ta bini ora nos ta haci pica y no arepenti, haci malo cu bo prohimo y no pidi despensa.
Biba den pica y haci bofon di Dios, tende e berdad pero keda rechasa e palabra di Dios.
Haci malo y no worry cu e consecuencia, sin temor di Dios. Apoya y aproba maldad djis pa complace cu hende.
Tin hopi hende ta cana bao di depresion y tin problema cu salud mental pa motibo di falta di pordon, y no kier laga los for di pasado, kier venga aunke no tin ganashi den vengansa.
Hende cu no kier permiti Dios cura nan curason ( Mateo 11:28)
Dios kier pa nos arepenti pa asina Dios por cambia nos curason di piedra pa curason di carni. Kico ta pasa ora bo ta haci bo curason duro pa Dios y pa hende. Bo ta herida bo sernan keri, famia, esposo/esposa y yiunan, y bo consenshi no ta morde.
Bo ta biba den maldad y cos nan cu ta haci bo daño pero toch bo no kier tende, por ehempel, droga , alcohol y inmoralidad .
Bo ta blokia Dios su entrada pa bo bida, pasobra bo no kier arepenti. Bo ta bira ciego y sordo pa responsabilidad.( Bo no ta mantene bo famia)
Bo kier haci tur cos riba bo mes. Bo ta rabia y bira violento masha lihe. Bo ta mas den carni, cu bo ta den Spirito (Juan 6:63)
Y ora bo no kier tende, Dios ta permiti bo curason hiba bo caminda e kier. ( Romanonan 1:24+25).
E palabra di Dios ta bisa den Romanonan 2:5: Pa motibo di bo capricho y bo curason cu no kier arepenti bo ta montona furia pa bo mes, den e dia di furia di e huicio husto di Dios.
Tene cuidao rumannan pa no tin den ningun di boso,un curason malbado y incredulo, door di aleha for di e Dios bibo.(Hebreonan 3:12).
Ta existi un duresa di curason durante y despues di divorcio, cu ta kibra hopi hende y nan tin cu arepenti di dje, pasobra nan kier biba lubida, pero Dios kier pa bo arepenti, y pordona.
Personanan cu ta kita yiu for di otro djis pa vengansa y pa haci otro dolor como prueba di duresa di curason. Un pregunta ? Ta di unda bo ta kere cu tin tanto duresa di curason den nos hobennan, cu hasta nan ta mata y keda rustig manera nada no a pasa?
Esey ta bini for di e bida duro di infancia, cos nan cu nan a mira sosode, y awor cu nan ta grandi nan kier imita. Ora un mucha wordo maltrata na chikito su curason ta bira di piedra ora e ta grandi.
Un hende nunca por compronde e dolor di un mucha cu a wordo separa for di su mama, of tata, djis pa envidia of duresa di curason. Nos no por lubida locual e palabra di Dios ta bisa nos den Mateo 6:14+15 cu si nos no pordona nos prohimo, Dios tampoco ta pordona nos.
Ora bo curason ta duro pa Dios y pa hende, bo ta bira un hende sin compasion.
Cu no tin duele di nada,cu ta rebeldia contra Dios y cu ta tuma vengansa hasta contra nan propio sanger,pa motibo di placa y propiedad. Dios den su misericordia ta pidi nos pa no haci nos curason duro, y sea humilde.
