Tur hende mester sa cu si bo no pordona bo prohimo,Dios tampoco ta pordonabo, y nos tur tin mester di pordon di Dios pa nos por avansa den bida, pasobra nos tur a peca, no tin hende bon riba e mundo aki solamente Dios ta bon.
Pero e diferencia den hende ta esun cu ta pordona, y esun cu no ta pordona, pa Dios nada ta keda scondi, y si bo haci manera bo a pordona y bo no a pordona, riba un bon dia tur cos lo sali na cla y abo lo keda na berguensa, pasobra bo a haci manera bo a huma e pipa di paz, pero na ningun momento bo no a hacie.
Mas tristo cu ta un hende cu no ta pordona ta un mentiroso, pasobra e a purba di gaña hende. Gañando su mes y trata di gaña Dios. Serca Dios bo no por sconde carta den manga di camisa, pasobra Dios ta wak bo Curazon.
Ora Mayornan no kier pordona otro, e yiunan ta wordo perhudica , pasobra e bon comunicacion cu mester tin den cas pa bon educacion no tey, y asina diabel ta tuma ventaha pa trece mas division posibel, pa e mantene tanto e mayornan como e yiunan den su gara.
Den e buki di Santiago capitulo 5 vers 16 en Adelante , Dios ta bisa pa nos confesa nos pica un na otro y pordona otro, y asina nos lo wordo sana. Hopi biaha bo ta mira un hende malo, pero e malesa ta mara na su falta di pordon, y na e momento cu e pordona su prohimo e malesa lo wordo sana.
Tin hende curazon duro ta prefera di muri den e situacion ey cu pordona, pasobra nan no ta compronde cu un curazon limpi tin comunicacion cu Dios. Pasobra un hende cu no ta pordona no ta bay Cielo ta Fierno e ta bay, tene cuenta cu pordon bo por hacie mientras bo ta na bida, ora bo muri ta laat.
Cuanto biaha mas Beibel no ta remarca cu cada biaha cu bo ta bay haci oracion, y bo corda cu bo tin algo contra di un hende, of un hende tin algo contra bo pordona e persona. Si bo ta bay duna bo ofrenda y bo corda cu un hende tin algo contra bo pordona, bira bek y bay pordona y despues duna bo ofrenda.
Isaias 43:18 ta splika cla y raspa , pa nos NO recorda e cosnan di antes , ni keda pensa riba cosnan cu a pasa caba. Pasobra Dios ta bay haci cosnan nobo.
Cada biaha cu pleito bieuw y vengansa di pasado lanta bek, e ta trece tardansa y tristesa, y dicon e ta bira un cos cu hende no por maneha, pasobra bo tin di bay bek na e raiz y arepenti, y pordona y despues cu bo tin paz bo por continua, no ta algo cu bo por haci sin yudansa di Dios, pasobra e ta un hecho Spiritual cu mester tuma lugar. Ningun hende no por pordona di berdad sin intervencion di Dios.
Ora bo tin hende riba bo curazon , bo ta yena cu odio , vengansa, orguyo bo oracion no ta yega plafond te pa bo oracion yega cielo.Hopi hende ta sirbi Dios na nan manera, pero ta un manera tin pa sirbi Dios ta den Spirito y Berdad. Y falta di pordon ta pone hende cana den mentira y desepcion, pasobra locual bo ta spera no ta bay sosode mientras cu bo no arepenti,pordona, y aleha for di maldad.
Tenemento di hende na curazon especialmente den Famia, ta un dolor cu hopi ta experiencia, y e ta stroba e bendicion di Dios den e cas. Pasobra ningun hende no por pasa over di e palabra di Dios.
Ora un den team di futbol no tin union , cada vez nan lo perde wega, pa falta di comunicacion,te ora e entrenador pone tur sinta, y kibra cu tradicion bieuw, y murmuracion, orguyo, y rebeldia, y asina nan por avansa, pasobra no ta importa cuanto plaka e Equipo tin, ni tampoco e hungadornan di fama, pero si no tin Amor y acuerdo den e equipo nan no por funciona.
Laga nos tene bon na cuenta cu no ta existi inmunidad di pica, na unda cu bo haci pica e ta keda pica dilanti di Dios.Den mundo di politica embahadornan tin cierto inmunidad, pero dilanti di Dios ningun hende tin e inmunidad di pica. ( Numbernan Cap 20 ver1-12)
Pesey ta dificil pa un Tata kere cu e tin mag di haci cierto cosnan y e Mama si no por, y e yuinan cuminsa actua rebelde bisando cu nan mayornan no tin nada di bisa pasobra nan ta mayor di edad.
Corda cu Dios tin e ultimo palabra den nos bida, Mateo 6:14 ta bisa :Pasobra si boso pordona hende na trangresionnan , boso Tata Celestial tambe lo pordona boso.Versiculo 15 ta bisa: Ma si boso no pordona hende ,boso Tata tampoco lo no pordona boso trangresionnan.
PESEY PA MEDIO DI E ARTICULO AKI Y E PALABRA DI DIOS TA URGI , TUR HENDE ,TUR FAMIA Y TUR INSTANCIA, PA PORDONA, Y LUBIDA COSNAN DI PASADO PA ASINA NOS TUR POR TRAHA PA PROGRESO Y BIENESTAR. Cristo Hesus ta na caminda.
