Feliz dia , nos ta pidi Señor den nomber di Cristo Hesus pa tur esnan afecta door di e virus por sana,y asina e preocupacion grandi por wordo kita for di riba nos isla.
E mentira di mas grandi cu a wordo inventa biblicamente ta para den Mateo Capitulo 28 vers 11 te cu 15. Ora cu ansianonan farizeo a a tene un raad y despues a paga e guardianan Romano un cantidad di placa, cual tambe ta soborno, pa asina bisa cu Hesus no a resusita pero ta su disipelnan a bin horte bay cune ora e guardianan tabata na soño.Aki nan nos por mira bon cla con lew placa y mentira por hiba hende. Awor e pregunta ta: Mentira ta haci dolor.
Tin hopi cos cu nos ta mira ta sosode awor , y cu nos ta puntra con por ta, pero su tras tin gran mentira.
Mentira ta bini di diabel, e ta tata di mentira, y su plan ta pa gaña hende y pone hende gaña otro, caminda e mentira no ta suficiente, e ta wordo acompaña pa placa, posicion, encubrimento, tur esey ta wordo haci basta e mentira tin su exito temporal. Hende no mester papia mentira, pasobra tras di mentira tin e actitud di diabel, mescos cu tras di e berdad tin e actitud di Cristo.
Y hopi hende ta cay a base di mentira, hopi hende ta prefera di no kere Dios pero kere den mentira.
Hopi mucha den problema, pasobra nan mayor a papia mentira cu nan.Un motibo masha conoci , ta di kibra cu un homber ora bo ta na estado y ora e yiu nace, ninga e homber e derechi di reconoce su yiu y bisa e yiu cu su tata a muri.
Otra mentira cu ta suta nos comunidad ta cu hende ta divorcia for di otro, y sembra maldad cu mentira den boca di mucha cu ta bisa cu su tata nunca a cria e mucha.
Otro mentira tambe cu tin comunidad sofoca ta tene relacion cu un persona y despues ninga te na morto cu e yiu no ta di bo.
Tur e cos nan aki ta mentira cu ta haci dolor y cu ta trece hopi problema social den nos cominidad.
Pero e aumento di mentira riba mundo, ta hopi grandi, e ta mas grandu cu e virus, y e por destrui mas famia cu e virus.Y esey ta e mentira cu hende por depende di nan mes y no tin mester di Dios.
Cuanto Pais mentira no a wordo destrui door di mentira. Pasobra e enemigo sa cu ora e mara e Presidente/ Mandatario den mentira e tin e pais den su gara. Mescos cu ora un tata cu ta cabes di cas ta papia mentira, henter Famia ta sufri. Nos tur ta mira con Pais grandi ta bay perdi door di mentira y capricho y e gara di e enemigo cual ta e diabel.
E tempo cu nos ta biba den dje awor aki Beibel ta yame tempo di dificultad, pasobra hende a bira ireconciliabel, aunke cu nan ta mira cu nan ta robes toch nan ta sigi persisti ,manera peliger no ta existi, hende den e tempo aki cu ciencia a aumenta, ta actua hopi bobo, pa motibo cu e no tin temor di Dios.Y nan wowo ta ciega door di mentira.
Dios ta cuida, Dios ta defende, pero nos no por tenta Dios, ta nos mes ta keda mal para.Den Mateo Capitulo 4 caminda diabel ta tenta Hesus, ta mustra nos bon cla, cu e mesun diabel ey awendia ta tenta nos, treciendo na nos mente, cu nos por biba manera nos kier, den un libertinahe desastroso, y spera tur cos bay bon cu nos.
Mescos cu crimen no ta paga, un dia nan lo garabo, asina tambe desobedencia na Dios lo trece berguensa.
Mentira a causa Gera grandi cu hopi destruccion y hopi hende a perde bida, mentira a kibra hopi Famia, mentira a pone hende sera inhustamente, mentira tin hopi mucha den rebeldia ,y hopi kier biba riba caya.
Mentira tin hopi hende a bira rico, pa un rato,pero tambe tin hopi den esclavitud, y dolor.
Mentira no conoce pober ni rico, caminda e hanja lugar pa drenta e ta drenta.
No laga mentira domina bo hogar, si tin algo den bo bida cu bo sa cu ta un mentira, drecha bo cuenta cu Dios awe mes , y no keda esclavisa na mentira pero busca e berdad den Cristo y tur cos lo ta bon pa abo y bo Famia
Ta solamente berdad ta haci hende liber.
Sinceramente
Pastor
Marcel Balootje.
