“Di un operacion di casi 24 ora pa dia, tur dia, Pasco y Aña Nobo…diripiente dia 13 di maart 2020, waf di Oranjestad a bira un compania practicamente paralisa, sin casi nada di movecion ni accion. Nos a mira nos entradanan cay drasticamente, sin por a mira luz na horizonte. Mi ta kere nos niun aki presente por a imagina un dia cu un virus lo paralisa mundo manera con cosnan a bay desde aña pasa”, asina Marc Figaroa, managing director di Aruba Ports Authority (APA) a duna di conoce na ocasion di yegada di e prome crucero bek pa nos isla.
“E intencion sigur no ta pa bay den lo negativo, pero ta djis pa mustra e extremo cu nos a pasa aden, di un operacion pisa pa un operacion super keto. Nos a siña di dje, mi coleganan a conoce ambos extremo. No solamente nos, pasobra henter nos pueblo a sintie tambe. Awe mas hende ta consciente di e importancia di e industria di crucero pa Aruba. Si antes tur hende tabata benta tur cos bou di turismo, awe ta bastante cla, cu e industria specifico di crucero ta hopi importante y tin un efecto directo den nos economia. Nos tur a haya su falta e ultimo aña aki.”
Pero e tempo ey ta tras di lomba y desde ayera nos waf ta habri atrobe pa ricibi cruceronan cu turista abordo. Ciudadanonan a mira tres, cuater y tin biaha hasta cinco crucero para den waf y e por a crea un percepcion cu nan tabata yen. E berdad ta cu e cruceronan ta djis staciona eynan cu tripulacion so abordo, sin pasahero.
“Cu binmento di e prome crucero despues di 15 luna, awe nos ta start e caminda di recuperacion di pasaheronan di crucero pa Aruba. E lo no ta facil, pero mi ta convenci cu e lo bay mas lihe compara cu otro islanan. Esaki pa motibo cu den e ultimo 15 lunanan nos no a keda cu nos mannan crusa. Hunto cu tur nos empleadonan, nos a lora manga di camisa y a traha extra duro, pa por finalisa procesonan nobo di con atende cu reglanan di salud, protocol cu gobierno, cu DVG, cu e lineanan di crucero, bou guia di e mesun protocolnan di CDC di Merca y mas”, asina Marc Figaroa a bisa durante di su discurso.
“Di otro banda nos a intensiva nos esfuersonan cu liñanan crucero, pa laga nan sa di nos protocolnan, cu e forma con Crisis team a atende cu e pandemia, cu gran parti di nos isla ta vacuna caba, cu nos ta bon prepara, etc. Nos esfuersonan no tabata envano pasobra a base diario nos ta haya feedback di e lineanan crucero, cu mayoria ta wardando e ultimo desaroyonan rond di e estado di Florida, na Merca, pa fiha nan strategia nobo. Pero mesun cos cu Celebrity Cruiselines, pa nan tambe Aruba ta halto riba nan lista di prioridadnan pa ora prepara iterinario”.
Pa Aruba Ports Authority, e momento ayera tabata special. Nan no a djis celebra yegada di e prome crucero despues di e temporada largo di pandemia, sino tambe ta inicia nan celebracion di 40 aña di existencia. A funda APA desde aña 1981 caba, hasta prome cu Aruba a bira un pais. Lo tabata dificil celebra memey di e pandemia aki, pero cu reapertura di waf ayera, nan tin motibo pa sigui traha mas duro ainda, pa logra mas crucero, mas pasahero y asina mas motibo pa corda cu ta for di cuater decada pasa caba a haci turismo crucero como un parti integral di nos turismo.
“Aruba, nos ta na un crusada transcendental pa nos turismo. Nos a siña masha lihe y na un forma duro, con tur cos ta relata na otro. Nos mester a cuida, casonan activo di Covid mester a baha, prome cu aerolineanan a cuminsa bula atrobe pa nos isla. Prome cu otro paisnan a habri frontera bek cu Aruba. Mesun cos ta conta y lo conta den e siguiente simannan pa nos industria di crucero. Menos caso activo nos tin, mas controla nos tin e virus, mas parti di nos poblacion ta vacuna, mas chens nos tin di por sigui atrae lineanan crucero grandi pa considera pa trece nan pasaheronan aki pasobra nan lo ta den bon man y na un isla casi liber di e virus”, asina Marc Figaroa a subraya durante su discurso, mustrando riba e importancia pa por conta riba e sosten di henter comunidad.
“Aki nos ta 80 empleado dedica na haci tur lo posibel pa haci e industria di crucero briya atrobe. Pero nos so no por, nos mester di tur partner, tour operador di tour, taxi, agencianan, henter nos industria di HORECA y nos pueblo. Ban haci esaki un esfuerso conhunto pa aki algun luna por bisa cu nos ta bek na unda nos tabata antes den e industria aki”, Marc Figaroa a finalisa bisando.
