Un grupo di manifestantenan uni na Richi Danies a sali awe tardi lat for di Postkantoor y a cana bay Parlamento di Aruba pa mustra nan malcontento contra leynan cu ta atende cu abusonan sexual. Dilanti Parlamento e manifestantenan a sinta riba caminda y a blokia L.G. Smith Boulevard y a menciona di lo no lanta tanten cu bin un solucion pa abuso di mucha.
Te ainda no a pidi pa entrega ningun manifiesto na Parlamentarionan, mas bien ta sinta na suela y a blokia e caminda. Polis a cera e caminda for di The Movies @ Renaissance Marketplace te na Renaissance Hotel. E grupo di manifestantenan ta menos di esunnan cu a bay mas prome. E diferencia ta cu e grupo aki ta demanda pa un solucion awe.
E organisadonan ta kere cu mester haya como 7 mil hende riba caya, pa por logra haya oido di Gobierno y Parlamento. Den e cuardo aki ta invita tur hende pa sali for di nan cas y yega dilanti Parlamento pa hunto mustra e politiconan cu pueblo ta fada cu e situacion aki.
Na dado momento Ricardo Croes a bay purba papia cu Richi Danies pafo pero e organisado di e manifestacion a bisa Croes pa e bay paden numa. Segun Danies, cu Ricardo Croes no a haci nada den tur e tempo cu e tabata den Parlamento pues awo no mester mas tampoco. Croes no a aprecia e forma con Danies a papia cu ne y a bis’e cu e no ta bay paden sino e lo bay su cas.
