Maneho monetario

Durante e reunion di dia5 di october2017 e Comite di Maneho Monetario (CMM)[1] di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki, basa riba data di augustus 2017.

Reservanan internacional

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua. Contraccionnan nota den e reservanan di divisa neto durante e luna di juli a resulta den un caida den e reserva internacional di divisa (−Afl. 14,8 miyon of −0,8 porciento) compara cu december 2016, mientras cu e reservanan oficial a expande  (+Afl. 13,9 miyon of +0,8 porciento), relata na diferencianan di rebalorisacion (Grafiek 1). Consecuentemente, e reservanan internacional y e reservanan oficial a yega, respectivamente, te na Afl. 1.877,6 miyon y Afl. 1.687,1 miyon.

Desaroyonan den credito

E crecemento di credito total dentro di e sector di banconan comercial a mantene su mes robusto (+5,7 porciento) compara cu December 2016. No obstante e caida registra den credito na consumidor (−1,4 porciento), en general credito bancario a keda positivo, debi na expancionnan den fiansa pa construccion di cas (+3,3 porciento), credito na empresa (+1,9 porciento) y un compra neto di Afl. 111,5 miyon di bononan di gobierno door di e banconan comercial.

Inflacion

A registra caida den tanto e prijsnan compara cu e aña anterior(−0,7 porciento) como den e promedio anual di inflacion (−0,4 porciento), manera midi den e Indice di Prijs di Consumo (CPI). Ambos bahada ta principalmente causa door diun reduccion den e tarifa di coriente (−14,0 percent) na Januari 2017. E promedio di inflacion ora exclui e componentenan di cuminda y energia a yega na 0,3 porciento, primordialmente reflehando un aumento den e componentenan di vivienda y hotel & restaurant.

Turismo

Durante e prome ocho lunanan di 2017, e debilidad den e mercado di turismo for di Venezuela a sigui manifesta den caidanan den e cantidad di bishitantenan total (−6,8 porciento) y anochinan permaneci na Aruba (−3,1 porciento). Di otro banda, a registra un expansion den e cantidad di turistanan crucero (+22,8 porciento), mientras cu e mercado Mericano a presta faborabelmente, loke ta refleha pa un impulso den e ingresonan turistico registra na banconan comercial (+5,5 porciento).

Placa den circulacion

Cantidad di placa den circulacion a registra unbahada levedi Afl. 3,1 miyon te na Afl. 4.164,5 miyon, compara cu fin-December 2016. E ultimo ta debi na contraccion den e reserva di divisa neto (−Afl. 36,6 miyon), parcialmente compensa door di un subida den e activo domestico neto (+Afl. 33,4 miyon) . E aumento den e componente domestico di placa den circulacion ta atribui na un expansion den credito na e sectornan priva (+Afl. 115,0 miyon) y publico (+Afl. 60,5 miyon), cual a wordo mitiga pa un caida den transaccionnan no relata na credito (−Afl. 142,0 miyon).Di otro banda, e bahada den e reserva di divisa neto a resulta principalmente door di transaccionnan relaciona cu pagonan paimportacion di mercancia, otro servicionan y transferencianan pa cuentanan den exterior. Esaki a wordo primordialmente mitiga pa entrada for di actividadnan di turismo.

Mercado financiero

Bahadanan a wordo nota den e averahe di interes riba prestamonan nobo (−1,7 punto di porcentahe te na 5,9 porciento) y den e averahe di interes riba depositonan nobo (−0,5 punto di porcentahe te na 1,4porciento), compara cu e luna anterior. Consecuentemente, e averahe den e margen di e tasa di interes riba prestamonan y depositonan nobo a cai cu 1,0 punto di porcentahe te na 4,5 porciento.

Advance rate

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,16 punto di porcentahe. Consecuentemente, no tabata tin razon pa cambia e “advance rate” di BCA.

[1] E CMM a ser institui na mei 2010 pa periodicamente evalua y determina e maneho monetario di BCA. Adicionalmente, CMM ta aspira pa mehora e transparencia di maneho monetario.