Maneho di Fundashon Tayer Sosial Sta. Martha i Fundashon Tayer Sta. Martha su ròl den un sektor turístiko kresiente

Frakshon di PAR a hasi un bishita di trabou na Mi Abilidat (SGR) i tambe na e selebrashon di 45 aña Fundashon Totolika. A bira kla ku den e kadena di kuido di personanan ku un desabilidat tayernan sosial ta esensial.

Fundashon Tayer sosial Sta. Martha ta okupá un posishon klave den e kadena di desaroyo sosial ekonómiko di un grupo relativamente grandi di persona den nos komunidat. E persona ku tin un desabilidat mental i/òf físiko i ku no ta bin na remarke pa un trabou regular, por haña un trabou ahustá na Fundashon Tayer Sta. Martha. Ademas Tayer Sosial Sta. Martha ta ofresé training i guia laboral na e grupo di personanan ku desabilidat pa asina haña un trabou riba merkado laboral.

Den kuadro di esaki un vishon i maneho basá riba e nesesidatnan di e grupo en konhunto ku un bista riba desaroyo sosial-ekonómiko di Pais Kòrsou ta importante. Na e momento nan aki Kòrsou su sektor turístiko ta kresiendo rápido. Frakshon di PAR ta mira oportunidat pa Fundashon Tayer Sosial Sta. Martha hunga un ròl importante den e desaroyo aki.

Inklushon laboral di personanan ku un desabilidat ta basa riba diferente tratado inkluyendo e tratado di ILO i derechonan  humano.  Pa esaki mester di un maneho diligente i dirigí. P’esei frakshon di PAR hasiendo uso di artíkulo 33 di nos reglamentu di órden ta tuma e inisiativa pa hasi un petishon pa un reunion di komishon sentral ku e punto di agènda:

“Maneho di Fundashon Tayer Sosial Sta. Marta  i Fundashon Tayer Sta. Martha su ròl den un sektor turístiko kresiente. ”

Mirando e punto di agènda nos lo ke presente den e reunion aki e minister di SOAW, representantenan di Fundashon Sentro di Konosementu i Integrashon Sosial, Laboral pa gruponan di Riesgo ( Sentro SOLARI) i tambe representante nan di CTB.