Dia 22 di februari ultimo, Altocomisario di Cuerpo Policial Aruba, Andrew Hoo, a emiti un “memorandum” den cual e ta afirma di ta para 100% tras di Alto Inspector Gino Winklaar, cu desde algun luna pasa ta encarga cu maneho diario na e districto di San Nicolas. E “memo” a bin despues cu un Sub Inspector a traha un rapport falso contra dje, relaciona cu un accidente dia 27 di october 2017 den cual e hefe di Polis tabata envolvi. A inclui informacionnan incorecto y falso den e rapport cu intencion pa perhudica e Alto Inspector. Un investigacion interno a saca afor cu nada ta berdad y cu e rumornan tabata mas bien redashi.
Pero cu e “memo” aki awo ta surgi e pregunta di oro: Kico ta bay sosode cu e Subinspector cu a prepara e rapport devastador contra su mesun superior? Lo bin un investigacion contra un Polis cu ta haci un “valse aangifte”? Con un Polis di e rango ey, cu tin un funcion clave den e organisacion policial por traha un rapport falso, e no ta haci’e un Polis no confiabel?
Mando Policial a tuma 13 luna pa por a conduci un investigacion rond di e famoso raport di e accidente cu Altoinspector Gino Winklaar tabata envolvi den dje, pa na final conclui cu locual tabatin skirbi den e rapport no ta cuadra cu berdad. Parce cu den algun dia caba e finalisa e investigacion, pero te despues di 1 aña a divulga e resultado. Cu e comunicado manda internamente den seno di Polis, a “clear” nomber di Winklaar, kende tin henter un trayecto ainda y cu oportunidad pa crece den e organisacion policial.
Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo.
Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas. For di momento cu Gino Winklaar ta na San Nicolas, a nota mehoransa den e forma di traha, den materialnan cu el a percura pa haya, incluyendo algun cambio den e infrastructura di e edificio.
