Resientemente Gobièrnu di Kòrsou a tuma e desishon ku ta kòrta den subsidio di tur fundashon. Tambe den esnan ku ta traha na bienestar di mucha.
Frakshon di MAN ta konsiente ku e situashon finansiero di pais Kòrsou no ta di kanta makamba pero ta di opinion si ku ora ta trata mucha, mester pensa un, dos, te asta tres biaha promé ku kòrta den subsidio di fundashonnan i organisashonnan ku ta traha na bienestar di nos muchanan. Frakshon di MAN ta di opinion si ku tampoko mester keda duna subsidio sin ku fundashonnan i organisashonnan ta duna kuenta i rason kon i na kiko nan ta gasta e plaka. Mester kumpli ku kuentanan anual i traha na un manera efisiente.
Gobièrnu mester garantisá ku e fondonan limitá ku ta bai pa e organsisashonnan aki ta keda usá optimalmente i sirbi e meta prinsipal, esta bienestar di e mucha. Frakshon di MAN ta hasi un apelashon riba Gobièrnu pa no kòrta den subsidio di fundashonnan ku ta traha na bienestar di mucha entrante presupuesto 2019. Entre tantu, frakshon di MAN a pidi un reunion públiko pa debatí ku Gobièrnu riba maneho di Bienestar di Mucha na Kòrsou.
