Mama di victima: Maltrato severo na warda di polis Sta. Cruz

Fin di siman tras di lomba a tuma luga un detencion tras di stacion di gasolin na Sta. Cruz. Segun informe, trahadonan di un Carwash a tuma contacto cu polis pa bin atende cu un persona agresivo cu pa un of otro motibo a causa un panico total den e luga.

Na momento cu polis a presenta a surgi un detencion cu forsa bruto pa asina por a transoprt’e pa warda di Sta. Cruz. Den imagen por a tuma nota cu mester a uza boei na man y pia pa por a domina e situacion.

Kico a pasa despues

Mama di e detenido, Julaika Dubero, a tuma contacto cu 24ora.com pa asina duna e otro banda di e sucedido y den ki situacion su yiu ta encontra su mes actualmente. Na momento cu a tuma contacto cu su persona el a dirigi su mes inmediatamente pa warda di polis na Macuarima. Akinan nan a informe cu su yiu ta deteni. Prome pregunta tabata e motibo cual nan a duna di conoce cu ta pa buracheria y desorden publico. Intencion tabata pa e bay cu nan cas pero mirando cu un fiscal auxiliar no a atende cu su yiu homber ainda e momento ey a opta pa haci lo corecto y laga e yiu na warda.

Homber a causa panico riba trahadornan di carwash na Santa Cruz

Homber a causa panico riba trahadornan di carwash na Santa Cruzhttps://24ora.tv/2IuTDRW

Posted by 24ora on Saturday, March 7, 2020

Pa 3:00AM ( marduga ) ta drenta un yamada di warda di polis cu e por bin busca su yiu na warda. Na momento cu el a yega warda e por a tuma nota cu su yiu para pafo sperando riba dje. Julaika ta conta cu tanto su persona como e tata a yega warda p’asina atende cu nan yiu. Nan por a observa mesora cu nan yiu tabata hopi golpia y completamente muha, di cabes te pia. Segun e mama ta informa, tabata mustra cu nan a muhe cu awa y e tabata full muha, tanto cabey como paña y na e momento ey e tabata pia abou para eyfo.

Un persona cu situacion medico delicado

Locual cu e mama di e victima a comparti cu 24ora ta cu e yiu homber di 34 aña a caba di pasa den un caterizacion. E ta un persona cu ta sufri di curason y na es momento di su detencion tabata purba di comunica esey na e agentenan. Un persona cu ta sufri di poco nervio y ta claustrofobico desde chikito. Cu semper tabata tin panico na momento di hay’e den cercania di polis ( autoridad ) y cu por ta causante di e actuacion cu a hiba na su detencion diasabra anochi.

Situacion grave y escalando

E unico peticion cu e hoben tabata tin na momento cu a lague den libertad, ta pa e bay cas pa e por drumi pasobra e no tabata sinti su mes bon. Na yegada el a bay baña y a subi cama, pero no por a drumi pasobra el a cuminsa saca. For di eynan e situacion a bira mas serio. E no por a stop di saca. Un ruman muhe a bay controla su curpa y aki a bin encontra cu tur e golpinan cu e tabata tin na su curpa. Un golpi fuerte na cabes, man y pia corta door di e boei, sla na rudia como tambe elleboog y asina por keda menciona. Mirando cu e victima no ta stop di saca for di momento cu el a yega a tuma decision di transport’e pa ImSan na San Nicolas. E victima tabata purba di warda pa e sinti su mes poco miho prome cu bay busca asistencia medico pero pa 2:00PM di diadomingo no por a warda mas. Na yegada nan a informa famia cu mirando su situacion, ta miho transport’e mesora pa Dr. Horacio Oduber Hospital na Playa cu lo tin e ekiponan necesario pa atende.

Mi yiu a cay flauw y keda for di tino pa basta ora

Locual ta informacion di kico a tuma luga, e mama ta conta cu ta poco pero cu e yiu ta insisti cu polis a golpi’e y scop’e den cel. E ta corda cu na momento cu el a drenta cel el a bira malo y a sinti su mes ta cay flauw, tambe a sinti un golpi fuerte na su cabes. Segun e victima, a pasa algun ora y na momento cu el a lanta,  e tabata full muha y a informe cu e ta keda den libertad.

Situacion medico actual

Riñon a collapse, curason a faya, y e ta na catheter. E situacion ta delicado. Te ainda e ta saca pero awo ta sanger, for di momento cu a yega cun’e Hospital e no a stop por completo pero poco poco el a bira menos. Su yiu ta interna na e momentonan aki y cu hopi golpi na curpa.

Mensahe di e Mama Julaika Dubero

“Na prome luga, mi no kier culpa niun hende. Si acaso mi yiu a comete un delito, e ta na su luga pa e para responsabel pa locual el a haci. Locual cu no ta bon ta cu e tin cu pasa den un maltrato asina grave na man di autoridad. Awe ta mi yiu, cu fe den Dios cu a scap’e, pero mañan por ta esun di bo y cu consecuencianan fatal. Pasobra e situacion lo por ta diferente y mi lo ta contando un otro version. E mensahe ta pa Husticia tuma nota di locual a pasa cu mi yiu, reflexiona, coregi y adapta na un miho sistema di trata detenidonan,” e mama a duna di conoce.

Ta spera un reaccion di parti Cuerpo Policial riba e incidente aki y asina evalua si acaso tin cualkier indicacion di algo robes a tuma luga y con lo bay atende cun’e.