E no ta normal cu un mucha ta sali for di Centro Ortopedagogico desde dia 10 di october y te cu ayera ta start un buskeda riba dje, pa awe dia 22 di november logra hay’e bek. Ta cuestionabel cu OC ta permiti un mucha bay “hang out” den Wilhelmina Park y despues cu e perde no ta pidi pa buskeda mesora tampoco. Polis a mobilisa awe diadomingo y a haya e mucha na cas di un amigo na Mabon, aunke cu famia ta nenga cu esaki ta cuadra cu berdad.
Nana Beaujon-Naar, mama di Yulie Naar di 15 aña di edad, a conta awe cu su yiu ta trankil pero e kier bin bek cas. E realidad ta cu e yiu tin como dos aña y mey caba interna den Centro Ortopedagogico (OC) na Dakota. E proceso ey no ta sosode di un dia pa otro, sino ta encamina via un proceso civil te cu un hues ta dicidi di pasa e “voogdij” (tutela) den man di Gobierno. Den casonan asina, Corte ta apunta Fundacion Guiami como e “voogd” nobo di muchanan asina y mester percura pa guia nan y prepara nan pa drenta comunidad bek asina cu nan ta asina leu. “Mi ta bezig cu Fundacion Guiami pa mira con nan por permiti mi yiu bin cas mas, pa prepara pa e bin full cas, asina e mama a splica awe”.
Riba e pregunta dicon a warda te tres dia pasa pa bay bati alarma na Fundacion Mi Voz pa Bo Voz, el a conta cu OC lo a informa polis mesora. Cinco dia despues, e mes a yama Fundacion Guiami pa puntra atrobe riba su yiu. Nan a sigur’e cu a raporta e caso na polis y cu ta buscando paradero di su yiu. Pero awe na polis el a compronde cu esey no ta berdad y cu nunca ni OC ni Fundacion Guiami a pidi polis pa busca su yiu muhe di 15 aña di edad cu tabata perdi. De facto, esey a haci e mama disgusta hopi pasobra e ta confia cu Gobierno ta kita su yiu di dje pa cuid’e miho cu ne y no pa lag’e scapa y despues no busc’e tampoco.
“Mi kier pa mi yiu bin bek cas. Mi ta kere cu hopi instancia y departamentonan di Gobierno mester drecha nan funcion tocante menornan di edad. Despues ora mi ta cla pa papia pa papia over di e tema, lo mi duna splicacion di kico ta kico”, asina Nana Beaujon-Naar a bisa awe, argumentando cu e ta den un lucha largo di dos aña y mey caba pa purba haya su yiu bek na cas, sin por logra ainda.
E mama a admiti cu e yiu a yega di scapa varios biaha caba for di e centro y berdad e ta bin cerca dje. Pero semper e mes ta hib’e bek OC, convenciend’e cu ey ta e miho luga pa e keda. E yiu semper ta bis’e cu e kier bay cas bek y no kier keda mas den e centro. “Pero e biaha aki e no a yama mi y no a bin cerca mi. Mi tin mas di un luna y mey sin tende nada di mi yiu”, asina e mama a sigura, despues cu a bis’e cu publico ta insisti di a mira nan hunto algun dia pasa.
Lisette Gomes, presidente di Fundacion Mi Voz ta Bo Voz tambe tabata presente dilanti ward’i polis di Oranjestad. El a conta cu polis a informa e mayornan cu nan a haya e mucha algo prome cu 12:00pm. Polis a informa e mayornan cu nan ta investigando riba diferente factor, por ehempel pa sa unda e tabata, kico ta pasando cu ne y pakico el a bay for di Centro Ortopedagogico (OC). Ta bon pa aclaria cu e mucha muhe aki ta bibando pa mas of menos 2 aña y mey caba den OC y como tal Fundacion Guiami ta su “voogd”. Pa por a yega asina leu, a cana henter un proceso den cual un hues a yega na e conclusion cu e mayornan mes no por lanta e mucha y ta pas’e den man di gobierno.
Fundacion Mi Voz ta Bo Voz a splice awe tardi dilanti ward’i polis cu for di Fundacion Guiami nan a compronde cu a duna e mucha 1 ora di tempo pa e por a bay cana den Wilhelmina Park, esta mas di 1 luna pasa, dia 10 di october 2020. Mirando esey, ta lanta e pregunta dicon anto a warda mas cu 1 luna pa bati alarma. Segun Gomes, nan fundacion mes a haya e “melding” 3 dia pasa y nan a activa mesora.
A sali afo awe cu e mucha muhe specifico aki a huy varios biaha caba y na mas di un ocasion a bay cerca su mama. Den tur e casonan, e mama mes ta bay entreg’e bek na OC pa e por sigui haya guia for di nan. E mama ta sinti cu su yiu ta protestando di e forma aki, pasobra de facto e lo kier bay biba bek cerca su mama. Pero den e caso specifico aki, e biaha aki e no a bay cerca su mama.
