E famia a cana hopi caminda caba. Nan no tin e pas desea den nan hogar den Rond Weg 86. Un mama di 96 aña 100% na tino kier biba su ultimo añanan di su bida den un trankilidad.
Un yiu homber cu problema mental pero tambe cu otro problemanan di salud. E ta kedando cerca su mama y ta dificil pa por deal cune. Su camber ta un desaster y e problema di droga a afecta asina hopi cu e tin mas cu 20 aña ta teroriza e famia y e barrio.
Despues di un operacion hasta e ta cana cu parti di su intestinonan ta Sali afo. E famia ta contento cu SPD ta saca un man, y tambe cu enfermeranan ta bin atende cu e problema di stoma caminda parti di tripa ta sali. Asina mes e yudansa ey no ta suficiente pa e trankilidad cu Cecilia Ridderstap kier den su hogar na Dakota. Silvio Everon mester di yudansa y esaki ta loke e mama ta rogando.
Polis a bolbe presenta na e adres dialuna atardi pasobra Silvio tabata causando problema. Ora cu nan a yega a topa cune drumi na entrada di cas. Polis a atende cune y pidi pa ambulance. Su salud a bay hopi atras. Durante combersacion cu e mama di 96 aña, el a roga nos pa pidi yudansa. E kier pa Respaldo tuma su yiu y atende cune pa su problema serio. Ora un mama pidi algo asina, ta pasobra e no por sigui mas cu e situacion. E mama mes a expresa cu e ta stima su yiu. Con bo mire of bire ta keda su mama. Pero e mes a cansa di tur loke ta pasando na e cas. Pesey mes a papia cu e demas miembronan di famia cu ta pidiendo tur manera pa un yudansa. Ora mira situacionnan asina, na dado momento bo ta puntra bo mes si tin instancia cu realmente ta prepara na Aruba pa yuda den casonan extremo. Dialuna bou custodia di Polis, Silvio Everon a bay Hospital.
Famia kier tambe pa e wordo opera y asina keda cla cu e problema di stoma cu ta habri y ta un problema pa Silvio. Ta spera cu awor si e dokter cu ta atende por haci e operacion necesario y no lage bin cas bek. Cualkier instancia profesional por pasa na e adres y asina yuda e famia.
