E dianan di e Director di Serlimar ta conta….anto riba un band’i man! Esaki ta un decision cu a cay den e Hunta di Supervision di Serlimar diaranson. E maneho hiba pa Hensley Davelaar a causa cu awe Serlimar ta na punto di bati bancarota. A causa un desaster financiero grandi durante cu Hensley Davelaar y Marelva Wever tabata responsabel na Serlimar.
Nan no a percura pa cuida interes financiero di e compania y a presta nan mes pa laga e Minister saliente dirigi nan na su antoho cu e miyonnan extra cu Parlamento a aproba ciegamente pa Serlimar. Te awe no tin un relato financiero di Serlimar.
Parlamento ta manera na soño y conscientemente ta keto riba e tema pasobra nan sa cu den Serlimar ta un desaster tin. Parlamento tabatin miedo di e Minister saliente y a prefera di cuida nan stoel. Awor e Minister a bay laga e desaster atras y ta ora pa actua y tur cos ta mustra cu Hensley Davelaar, sea awe diahuebs of mañan diabierna, lo tende cu e mester bay cas!
Di Marelva Wever no a tende masha ainda pero por bisa cu e tambe ta parti di e desaster awe den Serlimar hunto cu Hensley Davelaar. Unanimamente e Hunta di Supervision a dicidi cu nan lo kita e Director. Ya caba a instrui abogado pa cana e proceso di avisa e Director cu “e fiesta a caba”.
Ta papia aki di malgastamento di fondonan publico, inversionnan robes haci den proyectonan cu te awe no ta funciona. Entre otro e incinerator riba tereno di dump na Parkietenbos, duna na un compania yega na e ex Minister.
No mas cu algun siman pasa e CITGO a nenga di bende diesel na e trucknan di Serlimar debi na debe halto. Asina tin mas compania cu tin cuentanan halto habri, precisamente pasobra e entradanan na Serlimar no ta cubri nan gastonan mensual. Y esaki ta trabou di e Director Financiero, Marelva Wever, pa garantisa un balans y bon maneho di “cash flow”. Ta parce cu e sigui “ordo di ariba” ciegamente y awo cu e Minister no tey mas y no tin poder, e pober pionnan cu a yuda pusha garoshi tin cu paga e prijs.
E Minister nobo, Marisol Lopez-Tromp, a hereda un problema serio pa cu maneho di Serlimar y lo mester tuma accion mesora pa rescata e compania y rescata e servicio di maneho di desperdicio riba nos isla. Cu e presion enorme di CAFT riba finansa publico, no por ta asina mas cu Gobierno ta keda hinca placa den un compania cu ta wordo maneha manera un “bari sin fondo”. E Minister nobo ta determina pa pone ordo y garantisa continuacion di servicio di limpiesa.
