Recientemente a organisa un mainta di motivacion pa e alumnonan di examenklas di La Salle College den “The Ballroom”. Prome orador tabata Johnny Boekhoudt, psicologo na Orthopedagogisch Centrum, cu a duna un relato di su bida. E tabatin hopi obstaculo, pero cu perseverancia y dedicacion el a logra su metanan.
Tambe 3 ex-alumno di La Salle College a conta nan historia di tempo cu nan tabata bay scol na La Salle College y mustra cu nan tambe a sigui y caba MAVO, continuando nan studio na Colegio Arubano of EPI. Un ta studiante di Universidad di Aruba, un ta prepara su mes pa bay sigui studia na Hulanda y e otro ta docente di educacion fisico.
Un orador di motivacion internacional, Guy Bavli, a duna un presentacion fenomenal di e poder di bo mente. Siguientemente Roxanna Paula, trahado social di SKOA a duna tipnan valioso tocante con pa prepara bo mes pa un examen.
Na final un grupo di studiante di Universidad di Aurba bou direccion di sra. Charisse Hoen-Daly a haci diferente wega unda e alumnonan mester a mustra nan habilidad den planea, teamwork, resolve problema y perseverancia.
Pa clausura e dia e alumnonan mester a haci un reflexion di e dia. La Salle College ta gradici tur docente pa nan ayudo y tambe Aruba Bank cu a contribui pa asina nos por organisa e mainta aki. Un danki grandi na tur e oradornan y e team di Universidad di Aruba.
