E nomber di Leoncio Corona ta zonando un biaha mas y mas hende ta denuncia cu el a ranca placa for di nan.
Maikel Rodriguez ta un di nan cu ta sumamente desapunta cu el a cay den trampa. El a conta cu e tabata tras di un tereno y a bay varios biaha na DIP tras di e tereno. El a pidi pa un tereno specifico pa traha un cas. A bis’e cu e procedura tabata cu mester a haci un peticion y haci un cita cerca e minister so, mirando cu ta un tereno specifico pa traha cas.
Rodriguez a bay haci un cita e tempo ey na oficina di ex minister di Benny Sevinger. Eynan el a splica e caso. E minister e tempo ey a yama wak si e tereno tabata disponibel. E minister a bis’e cu e tereno ta disponibel, cual tabata positivo. El a manda copia di papel y tambe firma, y a bis’e pa warda e proceso.
Den e proceso, Rodriguez a bay DIP. Den un di e dianan ey, el a topa cu Leoncio Corona. E tempo ey eleccion a pasa caba. Corona a bisa Rodriguez cu tur e cosnan di minister Sevinger lo ta para. Corona supuestamente conoce hende eynan cu por yuda. E prome biaha Rodriguez no a haci caso. Di dos biaha cu el a bay, el a bolbe top’e. Eynan ta caminda cu Corona a cuminsa convence, mirando cu e no tabata tin noticia di nada. Eynan el a cay den trampa.
A convence
Ta basta placa Corona a ranca di Rodriguez y su ruman. Di Rodriguez mes el a ranca mas di 22 mil florin. Di su ruman el a ranca 9500, pa un total di riba 30 mil florin. E prome suma cu Corona a ranca for di Rodriguez, ta na momento cu el a bisa cu e ta bay handle e tereno. Rodriguez tabata kier su tereno y no a mira otro opcion. Corona a pidi’e un copia di su papelnan y a bis’e cu esaki ta un caso mas facil, mirando cu e minister a aprob’e y cu e ta bay yud’e pa e tereno sali, mirando cu hopi di e casonan aki lo a bay ta para.
A keda di acuerdo y lo cobr’e e mita, cual ta mas of menos 3500 pa 3700 florin. Un tempo a pasa y den e transcurso a bin cu un otro proposicion. El a mustr’e algun potret cu e tabata tin cu minister Otmar Oduber, cu na e momento ey, tabata miho, mustrando varios potret y a lague scucha combersacionnan entre dje y e mandatario pa confirma cu e por yuda.
Corona a bis’e cu nan ta bay facilit’e un kiosco y e kier a haci un negoshi cu Rodriguez como socio, mirando cu riba su nomber e no por a haci’e. Door cu e tabata un persona publico.
Aki Rodriguez a facilita Corona 15 mil florin, pa e por tin tur derecho den e negoshi. Corona a gañ’e cu e voice notenan.
Rodriguez a menciona cu unda ta mata ta cu e voicemailnan. Algun dia pasa, el a mira entrevista di un cabayero. Ora cu el a mira e cantidad di comentarionan como reaccion, el a bisa cu e mester desenmascara e homber aki. Un luna atras, tambe a haci un denuncia na warda di polis di Shaba caba. E no tabata mira ni placa ni nada. Awor aki Rodriguez ta haciendo un denuncia publico. Ta manera cu Corona tin un poder riba hende. Ruman di Rodriguez mes ta un persona dificil, asina mes el a gañe.
