Magic cla pa celebra 20 aňa cu e pueblo di Aruba

Tabata un 25 di April 1998 cu oficialmente por a anuncia cu tin un Radio Station nobo a nace na Aruba. Un fecha special pa Erin croes cu a mira su soño bira realidad na momento cu su propio Radio Station a bay “On Air”.

Binti aña pasa ora cu MAGIC FM a bay den aire oficialmente tur hende a pensa cu lo ta djies un Radio mas

Tabata un sorpresa agradabel cu a contagia tur hende for di prome dia cu su vibracion energetico te cu awe.

UN LOGRA GRANDI Y SPECIAL

Magic a bira realidad danki na Erin su perserverancia y pasion pa loke semper ela kere den dje. Mester bisa cu anke no tabata facil, pero despues di 20 aña e emisora a sa di mantene su sintonia y popularidad den e ultimo 20 añanan.

Conoci pa tur como e “Aruba’s broadcasting queen” Erin Croes a kere semper den e evolucion di technologia y a percura pa su radio tambe sigi cu e innovacion aki invertiendo constantemente pa keda semper ‘up to date’.

E META DI MAGIC FM

“Ora mi a start cu Magic, mi tabata desea pa Aruba tin un radio cu por para banda di cualkier standard internacional cu asta den exterior nan por sinti poco jaloers riba nos radio, pues cu nos por demostra cu nunca nos mester keda chikito of bao di nivel compara cu radionan internacional” segun Erin a duna di conoce..

“Nos tin un tarea hopi special pa Motiva, Entretene y Informa nos audiencia y cu e amor ey nos ta labora tur dia sjn excepcion. Cada dia ta un regalo di nos Creador pues nos mester bibe intensamente”.

PREMIONAN FABULOSO

Durante luna di April, Magic Team lo cuminsa cu e conocido “Yobida di Premio” pa su oyentenan durante programacionan diario henter dia.

E emisora a aserca diferente amigo comerciante cu a forma un team di celebracion otorgando premio pa asina regala e.o. Weekend stays, bon di Gasoline, dinners na restaurantnan renombra, gym membership, VIP card holders pa Cinema, lunch na restaurantnan renombra, certificadonan pa paña y sapato, certificado pa beautyshops, hardware stores, supermercado y hopi mas.

Un celebracion cu ta cuminsa den April 2018 y cu lo termina cu un anuncio sorpresa atrobe pa Aruba. Semper manteniendo e originalidad di MAGIC FM.

Erin kier gradeci for di awor caba henter e comunidad cu semper a apoya Magic, amigonan den Prensa y specialmente commerciantenan cu ta pone nan confiansa den e radio cu ta haci Magia, yena cu positivismo.

Mas cu tur Erin kier gradici su coleganan, e team manera e ta yama nan, cu semper ta apoye. Pa esnan cu ta kere cu sinta tras di un microfono ta facil, pronto lo trece un tiki di e trajectoria di dj’nan y presentadornan di programa nan Magic den media.

Magic ta un radio cu semper a pone respet, amor pa hende, informacion veridico y valioso, positivismo y alegria na prome lugar. Respet pa nos cultura y tradicionan. Amor pa nos isla y su hendenan.

For di awor caba Magic su staff y personal ta gradici un y tur cu di un forma of otro a contribui den e 20 aña aki y ta spera di por conta pa hopi aña mas y pa Keda pendiente pa mucho mas Magic.