Recientemente Aruba Lions Club a yama bon bini na un miembro nobo den e organisacion. Ta trata aki di Magaly Dijkhoff-Arends, huramenta pa Lion President Francis Leo. Esaki a sosode durante e Induction Yellow Jacket Night den un ambiente ameno den un grupo chikito hunto cu otro Lions y compaña pa su casa.
Desde aña 2012 Magaly Dijkhoff-Arends ta traha como Operations Manager na Universal Technologies Aruba. Di e forma aki tambe Aruba Lions Club cu hopi satisfaccion ta presenta na comunidad di Aruba un Leon nobo cu yen di animo pa traha boluntariamente pa comunidad. Despues di huramentacion, e miembro nobo Magaly Dijkhoff-Arends a ricibi su respectivo pin di Lion for di man di e president di Aruba Lions Club, su yellow jacket y su pakete corespondiente cu su instalacion. Lion Dietje Maduro ta esun cu a sponsor e miembro nobo.
Desde september I947 Aruba Lions Club ta envolvi den hopi proyecto na bienestar di comunidad. Door di e situacion di COVID e Leonnan di Aruba ta enfocando actualmente mas den area di Servicionan Social manera Hunger Relief project y Diabetes awareness project.
Tambe tin e proyecto cu servicio di Rolstoel y Cama special pa enfermonan na cas, Asistencia Publico y Hubenil y nan programa di Leo Club (organisacion hubenil). Aruba Lions Club ta hopi orguyoso bayendo den su di 74 aña di servicio humanitario cu sin duda ta algo pa elogia y por nota esey tambe na e miembronan di club, cu ta orguyoso di esunnan cu a lanta e club aki y di tur loke a logra haci den tur e añan ey y tambe ta orguyoso di e comunidad Arubano.
Si acaso bo ta reconoce bo mes y ta sinti bo atrai y kier mas informacion di Aruba Lions y su proyectonan, bishita e facebook page: Lions Club of Aruba of contact un di e miembronan di Aruba Lions Club cu bo conoce of tuma contacto cu Francis Leo via e-mail [email protected].
